ചാലക്കുടി: അപ്രതീക്ഷിതമായി വീട്ടില്‍ വിരുന്നെത്തിയ ചീങ്കണ്ണി വീട്ടുകാരെയും നാട്ടുകാരെയും പരിഭ്രാന്തിയിലാക്കി. അഥിതിയെ പിന്നീട് വനപാലകരും നാട്ടുകാരും ചേര്‍ന്ന് പിടികൂടി പുഴയില്‍ കൊണ്ടുവിട്ടു. ഇന്നലെ പുലര്‍ച്ചെ അഞ്ചോടെയാണ് അതിരപ്പിള്ളി വെള്ളച്ചാട്ടത്തിന് താഴെ പുഴയോരത്ത് താമസിക്കുന്ന തച്ചിയത്ത് ഷാജന്റെ വീട്ടുവരാന്തയില്‍ ചീങ്കണ്ണിയെത്തിയത്.
പുലര്‍ച്ചെ രണ്ടോടെ വാതിലില്‍ തട്ടുകയും മുട്ടുകയും ചെയ്യുന്ന ശബ്ദം കേട്ടെങ്കിലും വീട്ടുകാര്‍ വാതില്‍ തുറന്നില്ല. പട്ടികളും കുരങ്ങുകളും ഇതുപോലെ വാതിലില്‍ തട്ടുന്ന പതിവുണ്ടായിരുന്നു. അത്തരത്തിലുള്ളതാണെന്നാണ് വീട്ടുകാര്‍ കരുതിയത്. പുലര്‍ച്ചെ അഞ്ചോടെ വാതില്‍ തുറന്ന് നോക്കിയപ്പോഴാണ് പൂര്‍ണ വളര്‍ച്ചയെത്തിയ ചീങ്കണ്ണിയെ കണ്ടത്. ചീങ്കണ്ണിയെ ഓടിക്കാന്‍ ശ്രമം നടത്തിയെങ്കിലും നടന്നില്ല. തുടര്‍ന്ന് തീപ്പന്തം കാട്ടിയതോടെ ചീങ്കണ്ണി പുറത്തേക്ക് ചാടി. വിവരമറിഞ്ഞെത്തിയ നാട്ടുകാരും വനപാലകരും ഏറെനേരത്തെ ശ്രമത്തിനൊടുവില്‍ രാവിലെ എട്ടോടെ ചീങ്കണ്ണിയെ വരുതിയിലാക്കി. തുടര്‍ന്ന് പുഴയില്‍ കൊണ്ടുവിടുകയായിരുന്നു. വെള്ളച്ചാട്ടത്തിന്റെ അടിഭാഗത്ത് ചീങ്കണ്ണികളെ നിരവധിതവണ കണ്ടിട്ടുണ്ട്. അവ പുഴക്കരയിലേക്ക് ഓടിയെത്താറുണ്ടെങ്കിലും വീട്ടിനുള്ളില്‍ കയറുന്നത് ആദ്യമായാണ്.