റിയാദ്: അറബിക് ഇസ്‌ലാമിക് കാലിഗ്രഫിയില്‍ ശ്രദ്ധേയമായി മലയാളി വിദ്യാര്‍ഥിനിയുടെ ജിദ്ദയിലെ പ്രദര്‍ശനം. ജിദ്ദ ഇന്റര്‍നാഷണല്‍ ഇന്ത്യന്‍ സ്‌കൂള്‍ വിദ്യാര്‍ഥിനി ഹിബ ഹനാന്‍ പൊന്നാനി വരച്ച നൂറില്‍പരം അറബിക് ഇസ്‌ലാമിക് കാലിഗ്രഫിയുടെ പ്രദര്‍ശനമാണ് അറബിക് ഇസ്‌ലാമിക് കാലിഗ്രാഫിയില്‍ മലയാളികളുടെ അഭിമാനമായത്.

ജിദ്ദയിലെ ഇന്ത്യന്‍ സമൂഹത്തിന് പുറമെ മറ്റു രാജ്യക്കാരും പ്രദര്‍ശനം കാണാനെത്തിയത് അംഗീകാരമായാണ് ഏവരും കാണുന്നത്. വിജ്ഞാനപ്രദവും വ്യത്യസ്തവുമായ അനുഭവമായ ഇത്തരത്തില്‍ ഒരു പ്രദര്‍ശനവുമായി ഒരു മലയാളി വിദ്യാര്‍ഥിനി രംഗത്തെത്തുന്നതും ആദ്യമായാണ്. വ്യതിരിക്തത കൊണ്ടും ആകര്‍ഷണീയതകൊണ്ടും ഇവിടുത്തെ സമൂഹം നിറഞ്ഞ മനസ്സോടെയാണ് പ്രദര്‍ശനത്തെ സ്വീകരിച്ചത്.

പ്ലസ് ടു കഴിഞ്ഞ് ഉപരിപഠനത്തിനായി നാട്ടിലേക്ക് പോകാന്‍ തയ്യാറെടുക്കുന്ന ഹിബ ചിത്ര രചനയില്‍ ഒട്ടേറെ പുരസ്‌കാരങ്ങള്‍ നേടിയിട്ടുണ്ട്. ആള്‍ ഇന്ത്യ തലത്തില്‍ സോള്‍ ഓഫ് ഇന്ത്യ നടത്തിയ ആര്‍ട്ട് ആന്റ് ക്രാഫ്റ്റ് മത്സരത്തില്‍ ഒന്നാം സ്ഥാനവും അന്താരാഷ്ട്ര തലത്തില്‍ സഊദിയിലെ പ്രശസ്ത ചിത്രകാരി സഫിയ ബിന്‍സാഗര്‍ നടത്തിയ ചിത്ര രചന മത്സരത്തില്‍ രണ്ടാം സ്ഥാനവും കരസ്ഥമാക്കിയ ഹിബ സാമൂഹ്യ, വിദ്യാഭ്യാസ പ്രവര്‍ത്തകനായ അഷ്‌റഫ് പൊന്നാനിയുടെയും ഇന്ത്യന്‍ സ്‌കൂള്‍ അധ്യാപിക സീനത്ത് സമാന്റെയും മകളാണ്.

സമൂഹത്തില്‍ ശ്രദ്ധിക്കാതെ പോകുന്ന ഇസ്‌ലാമിക് കാലിഗ്രഫിക്ക് സ്വന്തമായ ശൈലിയിലൂടെ സംഭാവനകള്‍ നല്‍കി ഇസ്‌ലാമിക് കാലിഗ്രഫിയുടെ പ്രാധാന്യം ഉയര്‍ത്തിക്കാണിച്ച് സമൂഹത്തിനും വരും തലമുറക്കും അവബോധം സൃഷ്ടിക്കുകയാണ് ഹിബയുടെ ലക്ഷ്യം. കുട്ടികളില്‍ ഈ അറിവ് പകര്‍ന്നു നല്‍കുന്നതിനു വേണ്ടി പ്രദര്‍ശനത്തോടനുബന്ധിച്ച് അറബിക് ഇസ്‌ലാമിക് കാലിഗ്രഫി മത്സരവും സംഘടിപ്പിച്ചിരുന്നു. അല്‍റയാന്‍ പോളിക്ലിനികിന്റെ സഹകരണത്തോടു കൂടി അല്‍ റയാന്‍ ഓഡിറ്റോറിയത്തില്‍ നടത്തിയ പ്രദര്‍ശനം ഇന്റര്‍നാഷണല്‍ ഇന്ത്യന്‍ സ്‌കൂള്‍ ചെയര്‍മാന്‍ മുഹമ്മദ് ഇഖ്ബാല്‍ ഉദ്ഘാടനം ചെയ്തു. ടി.പി. ഷുഹൈബ് അധ്യക്ഷത വഹിച്ചു.