തിരൂര്‍: തിരുന്നാവായ കുത്തുകല്ല് സ്വദേശി കക്കാട്ട് യൂസഫലിയുടെ വീട്ടിലെ രണ്ട് ചെമ്മരിയാടിന്‍ കുട്ടികളെ നായക്കൂട്ടം കടിച്ചുകൊന്നു. ഇന്നലെ ഉച്ചയ്ക്ക് പന്ത്രണ്ടോടെയാണ് വീടിനുസമീപം മേയുകയായിരുന്ന ആട്ടിന്‍കുട്ടികളെ നായകള്‍ ആക്രമിച്ചത്. രണ്ട് ആട്ടിന്‍കുട്ടികളുടെയും കഴുത്തിലും തലയിലുമാണ് കടിയേറ്റത്.
ഒരു ആട് തല്‍ക്ഷണം ചത്തു. മറ്റൊന്ന് മൃതപ്രാണനായി മണിക്കൂറുകളോളം കിടന്നാണ് ചത്തത്. പ്രത്യേക പരിചരണം നല്‍കേണ്ട ഇനത്തില്‍പ്പെട്ട ആടുകളെ പാലക്കാട്ടു നിന്നാണ് മോഹ വില നല്‍കി വാങ്ങിയതെന്നും വീട്ടിലെ അംഗങ്ങളെ പോലെയാണ് ആടുകളെ വളര്‍ത്തിയിരുന്നതെന്നും യൂസഫലി പറഞ്ഞു.
പ്രദേശത്ത് ഇതിന് മുമ്പും വളര്‍ത്തുമൃഗങ്ങളെ തെരുവ് നായകള്‍ കടിച്ച് കൊന്നിരുന്നു. പ്രദേശത്ത് തെരുവ് നായ ശല്യം വര്‍ധിച്ചതിനാല്‍ കുട്ടികള്‍ക്ക് സ്‌കൂളില്‍ പോലും പോകാന്‍ കഴിയാത്ത അവസ്ഥയാണെന്ന് യൂസഫലി പറഞ്ഞു.