കോട്ടക്കല്‍: കൃഷി വിപുലീകരിക്കുന്നതിന് വേണ്ടി നിര്‍മാണം ആരംഭിച്ച മരവട്ടം പാടശേഖരത്തിലെ കനാല്‍നിര്‍മാണം അനിശ്ചിതത്വത്തില്‍. ഇതോടെ നഗരസഭയില്‍ നല്ല രീതിയില്‍ കൃഷി നടന്നിരുന്ന മരവട്ടം പാടശേഖരത്തിലെ കര്‍ഷകര്‍ പ്രതിസന്ധിയിലായി.
കോട്ടക്കല്‍ നഗരസഭയിലെ ഇരുപതാം വാര്‍ഡില്‍ ഉള്‍പ്പെടുന്ന മരവട്ടത്തെ 30 ഏക്കറോളം വരുന്ന പാടശേഖരമാണ് തരിശായി ഇത് മൂലം നശിച്ചുകൊണ്ടിരിക്കുന്നത്. പാടശേഖരത്തോട് ചേര്‍ന്ന വലിയ കുളത്ത് നിന്ന് കര്‍ഷകരുടെ ആവശ്യ പ്രകാരം നഗരസഭയുടെയും, കൃഷി ഓഫിസറുടെയും സഹകരണത്തോടെ അയ്യങ്കാളി തൊഴിലുറപ്പ് പദ്ധതിയിലുള്‍പ്പെടുത്തി കനാല്‍ നിര്‍മാണം ആരംഭിച്ചു.
ഇതോടെ ചില വ്യക്തികള്‍ ഇതിനെതിരേ പരാതിയുമായി മുന്നോട്ട് പോകുകയും ഏതാനും മീറ്ററുകള്‍ മാത്രം നിര്‍മാണം തുടങ്ങിയ കനാല്‍ പ്രവൃത്തി നിര്‍ത്തി വെക്കേണ്ടിയും വന്നു. കൃഷി വിപുലീകരിക്കുന്നതിന് ഇരുപത്തിയെട്ടോളം വരുന്ന കര്‍ഷകരുടെ ആവശ്യ പ്രകാരം പാടത്ത് കെട്ടി നില്‍ക്കുന്ന വെള്ളം കനാലിലേക്ക് ഒഴുക്കി തടയണ കെട്ടി ജലസേചനത്തിനായി സംരക്ഷിക്കുന്നതിനു വേണ്ടിയാണ് മുന്നൂറ് മീറ്ററോളം വരുന്ന കനാല്‍ നിര്‍മാണം ആരംഭിച്ചത്. കനാല്‍ നിര്‍മിച്ചാല്‍ കുടിവെള്ള ക്ഷാമം നേരിടുമെന്ന പരാതിയുടെ അടിസ്ഥാനത്തില്‍ കനാല്‍ പ്രവൃത്തി നിര്‍ത്തി വെപ്പിച്ചു. പരാതിയുടെ അടിസ്ഥാനത്തില്‍ കൃഷി അസി.ഡയറക്ടര്‍, നെല്‍വയല്‍ നിരീക്ഷണ സമിതിയും സ്ഥലം സന്ദര്‍ശിച്ച് കര്‍ഷകര്‍ക്ക് അനുകൂലമായ നിലപാടിലെത്തി.
ഇതിനു ശേഷം ആര്‍.ഡി.ഒ സ്ഥലത്തെത്തി ആറുമാസമായെങ്കിലും നടപടിയെടുത്തില്ലെന്ന് കര്‍ഷകര്‍ പറഞ്ഞു.
പാടശേഖരത്തില്‍ വെള്ളം കെട്ടി നില്‍ക്കുന്നത് വിളവെടുക്കുന്നതിന് തടസമാണെന്നും ഇതൊഴിവാക്കുവാന്‍ കനാല്‍ അത്യാവശ്യമാണെന്നും കൃഷി വകുപ്പ് അധികൃതരും പറയുന്നു. ആര്‍.ടി.ഒ യുടെ അനുമതി ലഭിക്കുന്ന ഉടനെ കനാല്‍ നിര്‍മിക്കുന്നതിനുള്ള പൂര്‍ണ പിന്തുണ നഗരസഭാ ചെയര്‍മാന്‍ കെ.കെ നാസറും കര്‍ഷകര്‍ക്ക് വാഗ്ദാനം ചെയ്തു.