തൃശൂര്‍: സമ്പൂര്‍ണ ജീവിതരീതിയായ ഇസ്‌ലാമിന്റെ ആശയങ്ങള്‍ പൂര്‍ണമായി ഉള്‍ക്കൊണ്ട് ഒരു വിശ്വാസിയായി ജീവിക്കാനാണ് താന്‍ ആഗ്രഹിക്കുന്നതെന്ന് എഴുത്തുകാരന്‍ കമല്‍ സി. നജ്മല്‍ അഭിപ്രായപ്പെട്ടു. സവര്‍ണ യുക്തി വാദവും ഇടത് ലിബറല്‍ വര്‍ണത്രയവും എന്ന വിഷയത്തില്‍ എസ്.കെ.എസ്.എസ്.എഫിന്റെ സാംസ്‌കാരിക വിഭാഗമായ മനീഷ എം.ഐ.സിയില്‍ സംഘടിപ്പിച്ച സായാഹ്‌ന സംഗമത്തില്‍ മുഖ്യ പ്രഭാഷണം നടത്തുകയായിരുന്നു കഴിഞ്ഞ ദിവസം ഇസ്‌ലാം മതം സ്വീകരിച്ച കമല്‍ സി.
ടി.എന്‍ ജോയിയില്‍നിന്ന് നജ്മല്‍ ബാബുവിലേക്കുള്ള മാറ്റം സവര്‍ണ ബോധം മനസില്‍ സൂക്ഷിക്കുന്ന പല യുക്തിവാദികളുടെയും ഉറക്കം കെടുത്തിയിരുന്നു. തങ്ങള്‍ കാത്തുസൂക്ഷിക്കുന്നത് ഉയര്‍ന്ന ചിന്താഗതിയാണെന്ന് ഉറക്കെ പറയുകയും തരം കിട്ടുമ്പോഴൊക്കെ സവര്‍ണ ഫാസിസത്തെ താലോലിക്കുകയും ചെയ്യുകയാണ് ഇത്തരക്കാര്‍ ചെയ്യുന്നത്.
പുരോഗമന പ്രവര്‍ത്തനങ്ങള്‍ ഹിന്ദു ചിഹ്‌നങ്ങള്‍ വ്യാപിച്ചുകിടക്കുന്ന സ്ഥലത്തേക്ക് കൊണ്ടുപോവുകയാണ് കമ്മ്യൂണിസ്റ്റുകാര്‍ ചെയ്യുന്നത്. ഒരു മുസ്‌ലിം സഖാവിനെ അംഗീകരിക്കാന്‍ കമ്മ്യൂണിസ്റ്റുകാരന് കഴിയില്ല. ഹിന്ദു ആചാരപ്രകാരം അയാളെ അടക്കം ചെയ്യുന്നതിന് അവരുടെ വിശ്വാസം തടസമാകാറില്ല. എന്നാല്‍ വിപ്ലവകാരിയായ നജ്മല്‍ ബാബുവിനെ ഒരുമുസ്‌ലിമായി കാണാന്‍ ഇവര്‍ ആഗ്രഹിച്ചിരുന്നില്ല. അങ്ങനെ സംഭവിച്ചാല്‍ അത് തങ്ങളുടെ പരാജയമായിട്ടാണ് അവര്‍ കണ്ടിരുന്നത്.
സുന്നികളെ പള്ളിയില്‍ കയറ്റണമെന്ന് കോടിയേരി പറയുമ്പോള്‍ ഇപ്പുറത്തും എന്തെങ്കിലും പ്രശ്‌നമുണ്ടാക്കാന്‍ പറ്റുമോ എന്ന് നോക്കുകയാണ്. ശബരിമലയില്‍ സ്ത്രീകള്‍ കയറണമോ എന്ന് കോടിയേരി പറയില്ല. പറഞ്ഞാല്‍ ഇപ്പുറത്തിരിക്കുന്ന പകുതി സഖാക്കള്‍ ബി.ജെ.പിയില്‍ പോകും. അത്രയേ വ്യത്യാസമുള്ളൂവെന്നും അദ്ദേഹം അഭിപ്രായപ്പെട്ടു.
ഓണംപിള്ളി മുഹമ്മദ് ഫൈസി ഉദ്ഘാടനം ചെയ്തു. ബഷീര്‍ ഫൈസി ദേശമംഗലം അധ്യക്ഷനായി. അഡ്വ. അനൂപ് കുമാരന്‍, വി.ആര്‍ അനൂപ് പ്രസംഗിച്ചു. ശഹീര്‍ ദേശമംഗലം സ്വാഗതവും മഹ്‌റൂറ് വാഫി നന്ദിയും പറഞ്ഞു.