പട്ടാമ്പി: ഓങ്ങല്ലൂര്‍ കാരക്കാട് ചെങ്ങണാംകുന്ന് റഗുലേറ്റര്‍ ഭാഗത്ത് കൂട്ടുകാരോടപ്പം മീന്‍പിടിക്കാനിറങ്ങി ഒഴുക്കില്‍പെട്ട നേപ്പാള്‍ സ്വദേശിയുടെ മൃതദേഹം നമ്പ്രം കടവില്‍ കണ്ടത്തി. നേപ്പാള്‍ സ്വദേശി രാജുവാ(30)ണ് ഒഴുക്കില്‍പെട്ടത്. ഞായറാഴ്ച ഉച്ചക്കാണ് സംഭവം നടന്നത്. കാരക്കാട് സ്‌ക്രാപ്പ് വ്യാപാരത്തിലെ ഡ്രൈവറായി ജോലി ചെയ്ത് വരുകയായിരുന്ന രാജു വര്‍ഷങ്ങളായി ഇവിടെ എത്തിയിട്ടെന്ന് നാട്ടുകാര്‍ പറഞ്ഞു. രാജുവിന്റെ മരണം നാടിനെ ദു:ഖത്തിലാഴ്ത്തി. കൂട്ടുകാര്‍ വിവരമറിയിച്ചതിനെ തുടര്‍ന്ന്്് ഒഴുക്കില്‍പെട്ട രാജുവിനായി ഷൊര്‍ണൂരില്‍ നിന്നുള്ള അഗ്നിശമന സേനാംഗങ്ങളോടപ്പം നാട്ടുകാരും പങ്ക് ചേര്‍ന്നു.
ഭാരതപ്പുഴയില്‍ ശക്തമായ അടിയൊഴുക്കുള്ളതിനാല്‍ മൃതദേഹം കണ്ടത്താന്‍ ആദ്യദിനം സാധിച്ചില്ല. പിന്നീട് ഇന്നലെ രാവിലെയും തെരച്ചില്‍ നടത്തുന്നതിനിടയിലാണ് നമ്പ്രം കടവില്‍ നിന്നും മൃതദേഹം കണ്ടത്തിയത്. കുടുംബത്തെ വിവരമറിയിച്ചതിനെ തുടര്‍ന്ന് പൊലിസ് മേല്‍നടപടികള്‍ സ്വീകരിച്ച് ചെറുതുരുത്തി ശാന്തിതീരത്ത് ദഹിപ്പിച്ചു.