റിയാദ്: ജിദ്ദയിലെ ഇന്ത്യൻ സമൂഹത്തിനു ഏറെ ആശ്വാസമായി ഒടുവിൽ അനുകൂല വാർത്ത. കെട്ടിടമൊഴിയാൻ കോടതി വിധി നേടിയ ഉടമയുടെ പിടിവാശിക്ക് മുന്നിൽ ഏറെ ദിവസത്തെ ചർച്ചകൾക്കൊടുവിലാണ് കെട്ടിടം തൽക്കാലം പഴയത് പോലെ ഉപയോഗിക്കാൻ ഇന്ത്യൻ എംബസി സ്‌കൂളിന് അവസരം കൈവന്നത്. ഇന്ത്യൻ സ്‌കൂൾ ബോയ്‌സ് സെക്ഷൻ കെട്ടിട വാടകയുമായി ബന്ധപ്പെട്ട പ്രശ്‌നം രാത്രി വൈകി നടന്ന ചർച്ചയിൽ പരിഹാരം കാണുകകയായിരുന്നു.

 

വ്യവസ്ഥകൾക്ക് ഹയർബോർഡ് അംഗീകാരം ലഭിച്ചതായും ഉടൻ ക്ലാസ്സുകൾ ആരംഭിക്കാനുള്ള ശ്രമം തുടങ്ങിയതായും ആക്ടിംഗ് പ്രിൻസിപ്പൽ ഡോ. നജീബ് ഖൈസ് അറിയിച്ചു. രാത്രി ഏറെ വൈകി പത്തു മണിക്കാണ് ചർച്ചകൾ അവസാനിപ്പിച്ചതെങ്കിലും കൂടിതൽ കാര്യങ്ങൾ വെളിപ്പടുത്താൻ ഇന്ത്യൻ എംബസി അധികൃതരോ മറ്റോ തയ്യാറായില്ല. ആക്ടിംഗ് പ്രിൻസിപ്പലാണ് വാട്‌സ് ആപ് സന്ദേശത്തിലൂടെ രക്ഷാകർത്താക്കൾക്ക് പ്രശ്‌ന പരിഹാരം ഉണ്ടായതായും ക്ളാസുകൾ ഉടൻ തുറക്കുന്നതായാലും സന്ദേശം അയച്ചത്.

 

കേന്ദ്ര വിദേശകാര്യ മന്ത്രാലയം പ്രശ്‌നത്തിൽ ഇടപെട്ടതായും സൂചനയുണ്ട്. കെട്ടിടം ഒഴിഞ്ഞതിനെത്തുടർന്ന് വിദ്യാർഥികളും രക്ഷിതാക്കളും കേന്ദ്ര വിദേശകാര്യ മന്ത്രിയുമായി ബന്ധപ്പെടുകയും സോഷ്യൽ മീഡിയ വഴി കാമ്പയിൻ ആരംഭിക്കുകയും ചെയ്തിരുന്നു. ഇതോടെ പ്രശ്‌നം ദേശീയ മാധ്യമങ്ങളും ഏറ്റെടുത്തു. തുടർന്നാണ് വിദേശകാര്യ മന്ത്രാലയം പ്രശ്‌നത്തിൽ ഇടപെട്ടതെന്ന് കരുതുന്നത്. കെട്ടിടം ഒഴിയാനുള്ള സമയ പരിധി അവസാനിച്ചതിനെ തുടർന്ന് ആൺകുട്ടികളെ പെൺകുട്ടികളുടെ കെട്ടിടത്തിലേക്ക് മാറ്റിയും സമയ ക്രമീകരണം വരുത്തിയും ശ്രമം  നടത്തിയെങ്കിലും വിജയിച്ചിരുന്നില്ല. അതിനിടയിലാണ് ചർച്ചയിലൂടെ പ്രശ്‌നം പരിഹരിച്ചത്.