കോട്ടയം: ബാര്‍കോഴ കേസ് പരിഗണിക്കുന്ന തിരുവനന്തപുരം വിജിലന്‍സ് കോടതി ജഡ്ജിക്കു ഭീഷണിക്കത്തയച്ചതിനെ കുറിച്ചുള്ള അന്വേഷണം അവസാനിപ്പിക്കാന്‍ പൊലിസ് ഒരുങ്ങുന്നതിനെതിരേ കേരള കോണ്‍ഗ്രസ് എം ചെയര്‍മാന്‍ കെ.എം മാണി സംസ്ഥാന പൊലിസ് മേധാവിക്കും തിരുവനന്തപുരം സിറ്റി പൊലിസ് കമ്മിഷണര്‍ക്കും കത്തു നല്‍കി.
പരാതിയില്ലെന്ന കാരണത്താല്‍ കേസ് എഴുതിതള്ളാന്‍ തീരുമാനിച്ചെന്ന പത്രവാര്‍ത്ത ശ്രദ്ധയില്‍പെട്ടതിനെ തുടര്‍ന്നാണ് അന്വേഷണം അവസാനിപ്പിക്കരുതെന്നു മാണി ആവശ്യപ്പെട്ടത്. ഭീഷണിക്കത്തില്‍ തന്റെ പേരു പരാമര്‍ശിക്കുന്നുണ്ടെന്ന വിവരത്തിന്റെ അടിസ്ഥാനത്തില്‍ ശാസ്ത്രീയവും സമഗ്രവുമായ അന്വേഷണം നടത്തി കുറ്റക്കാരെ നിയമത്തിനു മുന്നിലെത്തിച്ചില്ലെങ്കില്‍ തന്റെ പേരിനു കളങ്കമുണ്ടാകുമെന്നും മാണി പറയുന്നു.