എരുമപ്പെട്ടി: എരുമപ്പെട്ടിയില്‍ സ്‌കൂളില്‍ നിന്ന് മടങ്ങുകയായിരുന്ന യുവതിയും കുട്ടികളും സഞ്ചരിച്ചിരുന്ന ഇരുചക്ര വാഹനം അശ്രദ്ധയോടെ പുറകോട്ടെടുത്ത ലോറി ഇടിച്ച് വീഴ്ത്തി.
ലോറിക്കടിയില്‍ കുടുങ്ങിയ യുവതിയും കുഞ്ഞുങ്ങളും തലനാരിഴയ്ക്കാണ് മരണത്തില്‍ നിന്നും രക്ഷപ്പെട്ടത്. എരുമപ്പെട്ടി സര്‍ക്കാര്‍ ആശുപത്രിക്ക് സമീപമാണ് അപകടമുണ്ടായത്. നെല്ലുവായ് കള്ളിക്കാട്ടില്‍ ബിജുവിന്റെ ഭാര്യയായ നിത്യയും കുട്ടികളുമാണ് അപകടത്തില്‍പെട്ടത്. സ്‌കൂളില്‍ നിന്നും കുട്ടികളുമായി വീട്ടിലേക്ക് മടങ്ങുകയായിരുന്നു നിത്യ.
ആശുപത്രിക്ക് സമീപമുള്ള പമ്പില്‍ നിന്നും പെട്രോള്‍ അടിച്ച് വരുമ്പോള്‍ മുന്നില്‍ സഞ്ചരിച്ചിരുന്ന എരുമപ്പെട്ടി പഞ്ചായത്തിന്റെ കുടിവെള്ളം വിതരണം ചെച്ചുന്ന മിനി ലോറി പെട്ടെന്ന് നിര്‍ത്തി പുറകോട്ടെടുക്കുകയായിരുന്നു. ഇത് കണ്ട് നിത്യ ഇരു ചക്രവാഹനം നിര്‍ത്തിയെങ്കിലും അശ്രദ്ധയോടെ  പുറകോട്ടെടുത്ത ലോറി ഇടിക്കുകയായിരുന്നു. ലോറിക്കടിയിലേക്ക് വീണ ഇരുചക്ര വാഹന സഹിതം നിത്യയേയും മക്കളേയും ലോറി കുറച്ച് ദൂരം പുറകിലോട്ട് നിരക്കികൊണ്ട് പോയി.
ഇവരുടെ നിലവിളിക്കേട്ട് ഓടിയെത്തിയ നാട്ടുകാര്‍ ബഹളം വെച്ചപ്പോഴാണ് ലോറി ഇടിച്ചത് ഡ്രൈവര്‍ അറിയുന്നത്. ലോറിയുടെ ടയറിനടിയില്‍ നിന്ന് നൂലിട വ്യത്യാസത്തില്‍ നിത്യയും കുട്ടികളും അത്ഭുതകരമായി രക്ഷപ്പെടുകയായിരുന്നു. നിസാര പരുക്കുകള്‍ പറ്റിയ ഇവര്‍ എരുമപ്പെട്ടി സര്‍ക്കാര്‍ ആശുപത്രിയില്‍ ചികിത്സ തേടി.