കുഴല്‍മന്ദം: ജില്ലയുടെ മലയോരമേഖലയില്‍ ഡെങ്കിപ്പനി ഉള്‍പ്പെടെയുള്ളവ പടരുമ്പോഴും ആരോഗ്യവകുപ്പും പഞ്ചായത്തുകളും പ്രതിരോധ നടപടിയോ ശുചിത്വ നടപടികളോ സ്വീകരിക്കുന്നില്ലെന്നു പരാതി. ഓരോ ദിവസവും നിരവധി പേരാണ് പനിബാധിതരായി ആശുപത്രിയില്‍ ചികിത്സ തേടുന്നത്. സര്‍ക്കാര്‍ ആശുപത്രികളില്‍ ചികിത്സ തേടുന്നതിന്റെ മൂന്നിരട്ടി രോഗികള്‍ സ്വകാര്യ ആശുപത്രികളിലെത്തുന്നുണ്ട്. തരൂര്‍, ആലത്തൂര്‍, നെന്മാറ എന്നീ മൂന്നു നിയമസഭാ മണ്ഡലങ്ങളിലും സര്‍ക്കാര്‍ തലത്തിലും സ്വകാര്യ മാനേജ്‌മെന്റ് ആശുപത്രകളിലും ചികിത്സാ സൗകര്യങ്ങളുള്ള നല്ല ആശുപത്രികളില്ലാത്തതിനാല്‍ തൃശൂര്‍ മെഡിക്കല്‍ കോളജിനെയും തൃശൂരിലെ തന്നെ മറ്റു സ്വകാര്യ ആശുപത്രികളെയുമാണ് ജനങ്ങള്‍ ആശ്രയിക്കുന്നത്. ഇതിനാല്‍ ഡെങ്കിപ്പനി ബാധിതരുടെയും മറ്റും കണക്കുകളും കൃത്യമായില്ല.
മഴക്കാലത്തിനു മുമ്പ് നടത്തേണ്ട ശുചിത്വ ബോധവത്കരണ പ്രവര്‍ത്തനങ്ങളും നടക്കുന്നില്ലെന്നും ആക്ഷേപമുണ്ട്. വടക്കഞ്ചേരി ടൗണിന്റെ പരിസരപ്രദേശങ്ങളിലുള്ള  മാലിന്യകേന്ദ്രങ്ങള്‍ ഇല്ലാതാക്കാനുള്ള നടപടിയും ഇഴയുകയാണ്. മുമ്പൊക്കെ പേരിനെങ്കിലും വീടുകള്‍ കയറിയുള്ള ബോധവത്കരണ പരിപാടികള്‍ നടന്നിരുന്നു. ഇപ്പോള്‍ അതുമില്ലെന്നാണ് പറയുന്നത്. ഹോട്ടലുകളിലും മറ്റും പഴകിയതും ഭക്ഷ്യയോഗ്യമല്ലാത്തതുമായ ഭക്ഷണസാധനങ്ങള്‍ കണ്ടെത്തി നശിപ്പിക്കുന്ന നടപടികളും ആരോഗ്യവകുപ്പ് ചെയ്യുന്നില്ല. വഴിയോര ഭക്ഷണശാലകളിലെ ശുചിത്വമോ അവിടെ ഉണ്ടാക്കിവയ്ക്കുന്ന ഭക്ഷണസാധനങ്ങള്‍ ഭക്ഷ്യയോഗ്യമാണോ എന്നുള്ള പരിശോധനകള്‍ പേരിനു പോലുമില്ല.
ഹോട്ടലുകളില്‍നിന്ന് പഴകിയ ഭക്ഷണസാധനങ്ങള്‍ പിടികൂടിയാല്‍ പിടിച്ച് ഹോട്ടലുകളുടെ പേരുകള്‍ പുറത്ത് വരാത്ത വിധമാണ് രഹസ്യപരിശോധനകള്‍ നടത്തുന്നത്. ആഴ്ചകളും മാസങ്ങളും കേടുകൂടാതെ മത്സ്യം സൂക്ഷിച്ചു വയ്ക്കുന്ന സംവിധാനങ്ങളും പരിശോധനാ വിധേയമാക്കണമെന്നാണ് ആവശ്യം. കഴുകാന്‍ പറ്റാത്തവിധം ചീഞ്ഞളിഞ്ഞ മത്സ്യമാണ് ഫ്രഷ് മത്സ്യവുമായി വന്‍വിലയ്ക്ക് പലകടകളിലും വില്പന നടത്തുന്നത്. രോഗം പിടിപെട്ട് ചാകുന്ന മാടുകളുടെ മാംസവും വില്പനയ്ക്ക് എത്തുന്നതായി പറയുന്നു. ചില ഹോട്ടലുകളിലെ ബീഫ് കറിയും ചിക്കന്‍ കറിയുമെല്ലാം ഇത്തരത്തിലുള്ളതാണെന്നു പറയുന്നു. മാസങ്ങള്‍ പഴക്കമുള്ള ഐസ്‌ക്രീം ഇനങ്ങളും രോഗങ്ങള്‍ പടര്‍ത്തുമെന്നു ചൂണ്ടിക്കാട്ടുന്നു. ഇത്തരം ഐസ്‌ക്രീം വില്‍പനയും തകൃതിയാണ്. പഞ്ചായത്തുകള്‍ക്കൊപ്പം ആരോഗ്യവകുപ്പും ഭക്ഷ്യസുരക്ഷാവകുപ്പും ജാഗ്രത പാലിക്കണമെന്നാണ് ആവശ്യം.