ഡോര്‍ട്ട്മുണ്ട്: ജര്‍മന്‍ സൂപ്പര്‍ കപ്പില്‍ തുടര്‍ച്ചയായ നാലാം തവണയും കിരീടം ചൂടാമെന്ന ബയേണിന്റെ സ്വപ്നക്കുതിപ്പിന് വിരാമമിട്ട് ബൊറൂസിയ ഡോര്‍ട്ട്മുണ്ട്. സീസണില്‍ വിജയക്കുതിപ്പ് തുടരുന്ന ബയേണിനെ എതിരില്ലാത്ത രണ്ട് ഗോളുകള്‍ക്കാണ് ഡോര്‍ട്ട്മുണ്ട് പരാജയപ്പെടുത്തിയത്. ഡോര്‍ട്ട്മുണ്ടിന്റെ ആറാം സൂപ്പര്‍ കപ്പ് കിരീടമാണിത്. ഇനി ഒരു കിരീടം കൂടി ചൂടിയാല്‍ ഡോര്‍ട്ട്മുണ്ടിന്, ഏഴ് തവണ കിരീടനേട്ടത്തോടെ ഒന്നാം സ്ഥാനത്തുള്ള ബയേണിനൊപ്പമെത്താം.
സ്വന്തം മൈതാനമായ സിഗ്‌നല്‍ ഇടുന പാര്‍ക്കില്‍ മത്സരത്തിന്റെ രണ്ടാം പകുതിയിലാണ് ഡോര്‍ട്ട്മുണ്ട് എതിര്‍വല ചലിപ്പിച്ചത്. 48ാം മിനുട്ടില്‍ പാക്കോ അല്‍ക്കാസറിലൂടെ മുന്നിലെത്തിയ ഡോര്‍ട്ട്മുണ്ടിനായി 69ാം മിനുട്ടില്‍ ജാഡന്‍ സാഞ്ചോയും വല കുലുക്കിയതോടെ ഡോര്‍ട്ട്മുണ്ട് കിരീടം ഉയര്‍ത്തുകയായിരുന്നു.
മുന്‍ സീസണിലെ ബുണ്ടസ്‌ലിഗ ജേതാക്കളും ജര്‍മന്‍ കപ്പ് ജേതാക്കളും തമ്മിലാണ് സൂപ്പര്‍ കപ്പില്‍ ഏറ്റുമുട്ടുന്നത്. ഇക്കുറി രണ്ടും ബയേണ്‍ നേടിയതിനാല്‍ ബുണ്ടസ്‌ലിഗയിലെ രണ്ടാം സ്ഥാനക്കാരെന്ന നിലയിലാണ് ഡോര്‍ട്ട്മുണ്ട് എതിരായി വന്നത്.