ആലത്തൂര്‍: നെല്‍വയല്‍ തണ്ണീര്‍തട നിയമം ലംഘിച്ച് പാടങ്ങള്‍ മണ്ണിട്ട് നികത്തുന്നവര്‍ക്കെതിരെ കര്‍ശന നടപടി സ്വീകരിക്കണമെന്ന് താലൂക്ക് വികസന സമിതി യോഗം ആവശ്യപ്പെട്ടു. ഈ വിഷയത്തില്‍ ജാഗ്രത പാലിക്കാന്‍ കൃഷി ഓഫീസര്‍മാരോട് നിര്‍ദേശിച്ചു.
ഗുണമേന്മ കുറഞ്ഞതും ലേബലുകളോ തിയ്യതിയോ രേഖപ്പെടുത്താത്ത ഭക്ഷ്യ വസ്തുക്കളുടെ വില്‍പ്പന നടത്തുന്നവര്‍ക്കെതിരെ നിയമ നടപടികള്‍ സ്വീകരിക്കുക, വടക്കഞ്ചേരി ടൗണില്‍ കിഴക്കഞ്ചേരി റോഡില്‍ അനുഭവപ്പെടുന്ന ഗതാഗതക്കുരുക്ക് പരിഹരിക്കുവാന്‍ ശാസ്ത്രീയമായ നടപടികള്‍ സ്വീകരിക്കുക, ലഹരി വസ്തുക്കളുടെ ഉല്‍പ്പാദനവും വില്‍പ്പനയും തടയുന്നതിനാവശ്യമായ മുന്‍കരുതലുകള്‍ എടുക്കുക, ആലത്തൂര്‍ വടക്കഞ്ചേരി ടൗണുകളില്‍ കച്ചവട സ്ഥാപനങ്ങള്‍ക്ക് മുന്നില്‍ ഷെഡുകള്‍ നിര്‍മ്മിച്ച് വ്യാപാരം നടത്തി വരുന്നത് പൊളിച്ചു മാറ്റി ഗതാഗത സൗകര്യങ്ങള്‍ മെച്ചപ്പെടുത്തുക, വടക്കഞ്ചേരി ബി.എസ്്.എന്‍.എല്‍ ഓഫീസിന് മുന്നിലെ ബെല്ലക്കായ മരത്തിന്റെ കൊമ്പുകള്‍ മുറിക്കുക, മംഗലം ഡാം ചൂരുപാറ വടക്കഞ്ചേരി റൂട്ടില്‍ കെ.എസ്.ആര്‍.ടി.സി ബസ് ഗതാഗതം പുനസ്ഥാപിച്ച് ഈ പ്രദേശത്തെ വിദ്യാര്‍ത്ഥികളുടെയും സാധാരണക്കാരുടെയും യാത്രാ പ്രശ്‌നം പരിഹരിക്കുക, സ്‌കൂള്‍ സമയത്ത് ടിപ്പര്‍ ലോറികളുടെ ഗതാഗതം കര്‍ശനമായി നിരോധിക്കുക തുടങ്ങിയ ആവശ്യങ്ങളും താലൂക്ക് വികസന സമിതി യോഗത്തില്‍ ഉന്നയിക്കപ്പെട്ടു. കെ.ഡി.പ്രസേനന്‍ എം.എല്‍.എ അധ്യക്ഷനായ യോഗത്തില്‍ ബ്ലോക്ക് പഞ്ചായത്ത് പ്രസിഡന്റ് സി.കെ.ചാമുണ്ണി, ജില്ലാ പഞ്ചായത്ത് മെമ്പര്‍മാരായ യു.അസീസ്, എ.ടി. ഔസേപ്പ്, വി.മീനാ കുമാരി, അനിതാ പോള്‍സണ്‍, ഇന്ദിര, എം.കെ.അനില്‍ കുമാര്‍, എസ്.ഖദീജ പങ്കെടുത്തു.