ചേര്‍ത്തല: അര്‍ത്തുങ്കല്‍ ആയിരംതൈയില്‍ യുവാവിനെ വെട്ടിപരിക്കേല്‍പ്പിക്കുകയും പിന്നാലെ വീടുകളിലേക്ക് സ്‌ഫോടകവസ്തു എറിയുകയും ചെയ്ത കേസില്‍ ആറ് യുവാക്കളെ പൊലീസ് പിടികൂടി. ചേര്‍ത്തല തെക്ക് പഞ്ചായത്ത് നാലാംവാര്‍ഡില്‍ കോയില്‍പ്പറമ്പില്‍ യേശുദാസ് (അച്ചു-19), കോയില്‍പ്പറമ്പില്‍ അഖില്‍ (22), ചേര്‍ത്തല നഗരസഭ 17-ാം വാര്‍ഡില്‍ നെയ്പ്പള്ളിയില്‍ ശ്രീനാഥ് (18), പട്ടണക്കാട് പഞ്ചായത്ത് 14-ാം വാര്‍ഡില്‍ നിവര്‍ത്തില്‍ അശ്വിന്‍ (അച്ചു-19), വടക്കുംപറമ്പില്‍ ആല്‍ഫിന്‍ (18), കടക്കരപ്പള്ളി പഞ്ചായത്ത് അഞ്ചാംവാര്‍ഡ് വെളിയില്‍ അഞ്ജുകുമാര്‍ (ഉണ്ണി-20) എന്നിവരാണ് പിടിയിലായത്.
ബംഗളൂരുവിലേക്ക് കടന്ന പ്രതികളെ പൊലിസ് പിന്നീട് എറണാകുളത്ത്‌നിന്നാണ് അറസ്റ്റുചെയ്തത്. ആയിരംതൈ പള്ളി പെരുന്നാള്‍ കഴിഞ്ഞ് മടങ്ങിയ യുവാക്കള്‍ തമ്മിലുണ്ടായ വാക്കുതര്‍ക്കവും അടിപിടിയുമാണ് സംഭവത്തിന് തുടക്കം. ആക്രമണത്തില്‍ ചേര്‍ത്തല തെക്ക് പഞ്ചായത്ത് ഒന്നാംവാര്‍ഡില്‍ വാലയില്‍ സെബാസ്റ്റ്യന് (ജീമോന്‍-28) വെട്ടേറ്റിരുന്നു. എട്ടിന് പുലര്‍ച്ചെ നാലിന് ആയിരംതൈ പ്രദേശത്തെ രണ്ട് വീടുകളിലേക്ക് സ്‌ഫോടകവസ്തു എറിയുകയും ചെയ്തു. അര്‍ത്തുങ്കല്‍ പൊലിസിന്റെ അന്വേഷണത്തിലാണ് പ്രതികളെ തിരിച്ചറിഞ്ഞത്.
രണ്ട് സംഭവങ്ങളിലും ഒരേസംഘമാണെന്ന് കണ്ടെത്തി പിടികൂടാന്‍ ശ്രമിക്കുന്നതിനിടെയാണ് ഇവര്‍ ബംഗളുരുവിലേക്ക് കടന്നതായി പൊലിസിന് വിവരം ലഭിച്ചത്. ഡിവൈ.എസ്.പി എ.ജി ലാലിന്റെ നിര്‍ദേശപ്രകാരം അര്‍ത്തുങ്കല്‍ പൊലിസ് ബംഗളൂരുവിലെത്തി തെരച്ചില്‍ ആരംഭിച്ചു. ഈ വിവരം മനസിലാക്കിയ പ്രതികള്‍ എറണാകുളത്തേക്ക് തിരിക്കുകയായിരുന്നു. തുടര്‍ന്ന് ഇവരുടെ ബൈക്ക് എറണാകുളം സൗത്ത് റെയില്‍വേ സ്റ്റേഷന്‍ പരിസരത്തെ പേ ആന്‍ഡ് പകര്‍ക്കില്‍ കണ്ടെത്തി.
ബൈക്ക് എടുക്കുന്നതിന് എത്തിയപ്പോള്‍ പാര്‍ക്ക് നടത്തിപ്പുകാരുടെയും കടവന്ത്ര പൊലിസിന്റെയും സഹായത്തോടെയാണ് പ്രതികളെ വലയിലാക്കിയത്. പ്രതികളെ കോടതി റിമാന്‍ഡ് ചെയ്തു. അര്‍ത്തുങ്കല്‍ പൊലിസ് സ്റ്റേഷനിലെ ഗ്രേഡ് എസ്.ഐ ഇറാബിന്‍സണ്‍, സിവില്‍ പൊലിസ് ഓഫിസര്‍മാരായ ശ്യാം, ലിജോ എന്നിവരാണ് അന്വേഷണത്തിനായി ബംഗളൂരുവില്‍ പോയത്. അര്‍ത്തുങ്കല്‍ എസ്.ഐ ജിജിന്‍ ജോസഫ്, സിവില്‍ പൊലിസ് ഓഫിസര്‍മാരായ സേവ്യര്‍, ഗിരീഷ്, മണ്ണഞ്ചേരി സ്റ്റേഷനിലെ സിവില്‍ പൊലിസ് ഓഫിസര്‍മാരായ ഷാനവാസ്, അരുണ്‍, വിപിന്‍ദാസ് എന്നിവര്‍ ചേര്‍ന്നാണ് പ്രതികളെ എറണാകുളത്തുനിന്ന് അറസ്റ്റു ചെയ്തത്.