സുനി അല്‍ഹാദി

കൊച്ചി: എറണാകുളം മാഞ്ഞാലിക്ക് സമീപം കരുമാനൂരില്‍ പൂര്‍ണമായി വെള്ളത്തില്‍ മുങ്ങിയ വീട്ടില്‍നിന്നു ഒരുചാക്ക് നിറയെ സാധനങ്ങളുമായി ഡിഗ്രി വിദ്യാര്‍ഥിയായ നിധിന്‍ കഴുത്തൊപ്പം വെള്ളത്തില്‍ നീന്തി കരയിലെത്തി.
വീടിനുമുന്നിലെ പെരിയാറിന്റെ കൈവഴിയുടെ ഒഴുക്ക് ഒന്നിലേറെ തവണ പിടിച്ചുകുലുക്കിയിട്ടും തലയിലെ ചാക്കുകെട്ട് നിധിന്‍ മുറുകെപ്പിടിച്ചു. കഴിഞ്ഞപ്രളയത്തില്‍ സര്‍വതും നഷ്ടപ്പെട്ട നിധിന്റെ കുടുംബത്തിന് പലരും നല്‍കിയ സാധനങ്ങളായിരുന്നു ചാക്ക് നിറയെ.
ബിസ്‌ക്കറ്റും പഞ്ചസാരയും മൂന്നു കുപ്പി വെളിച്ചെണ്ണയുമൊക്കെ അതിലുണ്ട്. കൂലിപ്പണിക്കാരനായ അച്ഛന്‍ വിക്രമനും അമ്മ അനിതയും അനുജന്‍ അസലും അടങ്ങുന്ന നിധിന്റെ കുടുംബം വ്യാഴാഴ്ച രാത്രി വീടുപൂട്ടി ഇറങ്ങിയതാണ്.
വീട്ടില്‍ വെള്ളം നിറയുന്നത് കണ്ട് ആകെ ഭീതിപൂണ്ട് അച്ഛന്‍ തങ്ങളെയും വിളിച്ചിറങ്ങുകയായിരുന്നെന്ന് നിധിന്‍ പറഞ്ഞു. കഴിഞ്ഞപ്രളയം സര്‍വതും കവര്‍ന്നപ്പോള്‍ ദുരിതാശ്വാസ ക്യാംപിലേക്കായിരുന്നു നിധിന്റെ കുടുംബം അഭയം തേടിയത്. എന്നാല്‍ രോഗിയായ അമ്മയ്ക്ക് ക്യാംപില്‍നിന്ന് ഏറെ ദുരിതം പേറേണ്ടിവന്നതിനാല്‍ ഇത്തവണ എഴിക്കരയിലെ അമ്മവീട്ടിലേക്ക് മാറുകയായിരുന്നു.
കഴിഞ്ഞവര്‍ഷം പ്രളയും പൂര്‍ണമായും വീടെടുത്തിരുന്നു. സര്‍ക്കാരില്‍നിന്ന് പതിനായിരം രൂപ മാത്രമാണ് ലഭിച്ചത്. പിന്നെ താന്‍ പഠിക്കുന്ന മാറമ്പള്ളി എം.ഇ.എസ് കോളജിലെ അധ്യാപകരുടെ സഹായത്താലാണ് വീടിന്റെ അറ്റകുറ്റപ്പണി നടത്തിയത്. തന്റെ അധ്യാപികയായ സ്വപ്നയാണ് സഹായിക്കാന്‍ മുന്‍കൈ എടുത്തതെന്നും ബി.ബി.എ വിദ്യാര്‍ഥിയായ നിധിന്‍ 'സുപ്രഭാത'ത്തോട് പറഞ്ഞു.
ഇത്തവണ വെള്ളം കയറിയതിനെതുടര്‍ന്ന് വീട്ടിലുണ്ടായിരുന്ന സര്‍വതും നശിച്ചു. വളരെ കഷ്ടപ്പെട്ടാണ് ഒരു ടി.വി വാങ്ങിയത്. അത് മാത്രമാണ് ഇപ്പോള്‍ അവശേഷിക്കുന്നത്. അയല്‍വാസിയായ ഒരു ഓട്ടോ ഡ്രൈവറുടെ സഹായത്താലാണ് തന്റെ ടി.വി സുരക്ഷിതമായിരിക്കുന്നത്.
മഴയെ തുടര്‍ന്ന് ഓടിക്കാന്‍ കഴിയാതെവന്നതിനെ തുടര്‍ന്ന് ഓട്ടോറിക്ഷ അയല്‍വാസി വെള്ളംകയറാതിരിക്കാന്‍ മാഞ്ഞാലിപ്പാലത്തില്‍ കൊണ്ടുപോയി ഇടുകയായിരുന്നു.
തുടര്‍ന്ന് നിധിന്‍ അനുമതി വാങ്ങി ടി.വി സുരക്ഷിതമായി പ്ലാസ്റ്റിക് കൊണ്ട് പൊതിഞ്ഞ് ഓട്ടോറിക്ഷയുടെ സീറ്റില്‍ കെട്ടിവയ്ക്കുകയായിരുന്നു.
മഴതോരുമ്പോഴൊക്കെ എഴിക്കരയിലെ അമ്മ വീട്ടില്‍നിന്നു നിധിന്‍ മാഞ്ഞാലിപ്പാലത്തിലേക്ക് ഓടിയെത്തും; തന്റെ ടി.വി സുരക്ഷിതമാമെന്ന് ഉറപ്പുവരുത്താന്‍.
നിര്‍ത്താതെ പെയ്യുന്ന പേമാരി നിധിന്റെ വീടിനുചുറ്റും കടുത്ത വെള്ളപ്പൊക്കമാണ് സൃഷ്ടിച്ചിരിക്കുന്നത്.
വീട്ടിലേക്ക് എപ്പോള്‍ തിരികെ എത്താന്‍ കഴിയുമെന്നൊന്നും നിധിന് അറിയില്ല. കഴിഞ്ഞപ്രളയം വിഴുങ്ങിയ വീട് നിരവധിപേരുടെ സഹായത്താലാണ് വീണ്ടെടുത്തത്. ഇനി എന്ത് എന്ന ചോദ്യമാണ് നിധിന്റെ മനസു നിറയെ.