കൊച്ചി: പ്രളയ ദുരിതത്തിലായ സംസ്ഥാനത്തിന് കൈത്താങ്ങാവണമെന്ന അഭ്യര്‍ഥനയുമായി പൊലിസ്. ഫേസ്ബുക്ക് പോസ്റ്റിലൂടെയാണ് പൊലിസിന്റെ അഭ്യര്‍ഥന.
കൂടാതെ തന്റെ കടയില്‍ നിന്ന് വസ്ത്രങ്ങള്‍ നല്‍കി ദുരിത ബാധിതരെ സഹായിച്ച നൗഷാദിന് പ്രശംസയുമുണ്ട്. 'കൈകോര്‍ക്കാം കൈത്താങ്ങാകാം' എന്ന തലക്കെട്ടിലാണ് പോസ്റ്റ്.

കേരളം മറ്റൊരു പ്രളയകാലത്തെ അതിജീവിക്കുവാന്‍ പോരാടുമ്പോള്‍ സഹജീവി സ്‌നേഹത്തിന്റെയും കരുതലിന്റെയും നന്മയുടെയും സുമനസുകളാകാന്‍ നമുക്ക് കഴിയണം.
ഈ ദുരിതകാലത്തും നുണപ്രചാരണങ്ങളാല്‍ വെറുപ്പിന്റെ വിത്തുവിതയ്ക്കാന്‍ ചിലര്‍ ശ്രമിക്കുമ്പോഴും നന്മയുടെയും മനുഷ്യത്വത്തിന്റെയും സന്ദേശമായി മാറുകയാണ് മാലിപ്പുറം സ്വദേശിയായ നൗഷാദ് എന്ന കച്ചവടക്കാരന്‍.
ഈ മനുഷ്യന്റെ ആകാശത്തോളം പോന്ന നന്‍മ കണ്ട് കേരളത്തിന്റെ കണ്ണ് നിറയുകയാണ്. ദുരിതബാധിതരെ സഹായിക്കാന്‍ നൗഷാദിനെപ്പോലെ ധാരാളം പേര്‍ രംഗത്തുണ്ട്.

നാം ഒരുമയോടെ അതിജീവിക്കേണ്ട നാളുകളാണെന്നും നമുക്കോരുത്തര്‍ക്കും നന്മയുടെ മാതൃകയാവാമെന്നും പോസ്റ്റില്‍ പറയുന്നു.