തിരുവനന്തപുരം: പരിസ്ഥിതി ദിനാചരണത്തോടനുബന്ധിച്ച് സര്‍ക്കാര്‍ സംഘടിപ്പിക്കുന്നത് വിപുലമായ പരിപാടികള്‍. ഗവര്‍ണറും മുഖ്യമന്ത്രിയും മന്ത്രിമാരും വിവിധ പരിപാടികളില്‍ പങ്കെടുക്കും. ഗവര്‍ണര്‍ പി. സദാശിവം നിശാഗന്ധി ഓഡിറ്റോറിയത്തില്‍ രാവിലെ 10.30ന് പരിസ്ഥിതി ദിനാചരണവും വൃക്ഷത്തൈ നടീലും ഉദ്ഘാടനം ചെയ്യും. മന്ത്രി കെ.രാജു അധ്യക്ഷത വഹിക്കും.
രാജ്ഭവന്‍ വളപ്പില്‍ ഉച്ചയ്ക്ക് 12ന് ഗവര്‍ണര്‍ വൃക്ഷത്തൈ നടും. നടന്‍ മോഹന്‍ ലാല്‍ 9.30ന് തുമ്പ സെന്റ് സേവ്യേഴ്‌സ് കോളജില്‍ വൃക്ഷതൈ നടും. മുഖ്യമന്ത്രി പിണറായി വിജയന്‍ കണ്ണൂര്‍ പിണറായി എ.കെ.ജി ഹയര്‍ സെക്കന്‍ഡറി സ്‌കൂളില്‍ രാവിലെ 9.30ന് ദിനാചരണവും വൃക്ഷത്തൈ നടീലും ഉദ്ഘാടനം ചെയ്യും. മന്ത്രി രാമചന്ദ്രന്‍ കടന്നപ്പള്ളി പങ്കെടുക്കും.
മുഴുവന്‍ സ്‌കൂളുകളിലും നടപ്പാക്കുന്ന മഴക്കൊയ്ത്തുത്സവത്തിന്റെ സംസ്ഥാനതല ഉദ്ഘാടനം രാവിലെ 9.30ന് കോഴിക്കോട് മെഡിക്കല്‍ കോളജ് കാംപസ് ഗവ. ഹയര്‍സെക്കന്‍ഡറി സ്‌കൂളില്‍ മന്ത്രി പ്രൊഫ.സി. രവീന്ദ്രനാഥ് നിര്‍വഹിക്കും. മന്ത്രി ടി.പി. രാമകൃഷ്ണന്‍ പങ്കെടുക്കും.
നന്മമരം പദ്ധതിയുടെ സംസ്ഥാനതല ഉദ്ഘാടനം രാവിലെ 9ന് തൃശൂര്‍ ഗവ. മോഡല്‍ ബോയ്‌സ് ഹയര്‍ സെക്കന്‍ഡറി സ്‌കൂളില്‍ മന്ത്രി വി.എസ്. സുനില്‍ കുമാര്‍ ഉദ്ഘാടനം ചെയ്യും. ഓണത്തിനൊരു മുറം പച്ചക്കറി പദ്ധതിയുടെ ഉദ്ഘാടനം മന്ത്രി എ.സി മൊയ്തീനും ഓണത്തിനൊരു പറനെല്ല് പദ്ധതിയുടെ ഉദ്ഘാടനം സി.എന്‍. ജയദേവന്‍ എം.പി യും നിര്‍വഹിക്കും.
മന്ത്രിമാരായ ഇ. ചന്ദ്ര ശേഖരന്‍ 11 ന് കാസര്‍കോട് ഉദന്നൂര്‍ സെന്‍ട്രല്‍ എ.യു.പി സ്‌കൂളിലും ജെ. മെഴ്‌സിക്കുട്ടി അമ്മ 10ന് കൊല്ലം ഗവ. ബോയ്‌സ് എച്ച്.എസ്.എസിലും ഡോ. ടി.എം. തോമസ് ഐസക് 10ന് ആലപ്പുഴ എ.എം.എസ്. ഡി.വി സ്‌കൂളിലും ജി. സുധാകരന്‍ 9.30ന് ആലപ്പുഴ ഗേള്‍സ് ഹയര്‍സെക്കന്‍ഡറി സ്‌കൂളിലും കെ.ടി. ജലീല്‍ 10ന് കല്‍പറ്റ ഗവ. കോളജിലും എ.കെ. ബാലന്‍ 10ന് പെരിങ്ങോട്ട് കുറിശ്ശി ബൊമ്മണ്ണൂര്‍ ഹൈസ്‌കൂളിലും എം.എം. മണി 9ന് ഇടുക്കി രാമക്കല്‍മേട്ടിലും കെ.കെ. ശൈലജ 9ന് തിരുവനന്തപുരം കരകുളം ഗവ. യു.പി സ്‌കൂളിലും ദിനാചരണ പരിപാടികളില്‍ പങ്കെടുക്കും..