റിയാദ്: സഊദി ദേശീയ എണ്ണകമ്പനിയായ അരാംകോയ്ക്ക് കീഴിലെ പ്രകൃതി വാതക കേന്ദ്രത്തിന് നേരെ ഹൂതികള്‍ ഡ്രോണ്‍ ആക്രമണം നടത്തി. ആക്രമണത്തില്‍ ശൈബ പ്രകൃതി വാതക ദ്രവീകരണ സംവിധാനത്തില്‍ ചെറിയ തോതില്‍ തീപിടിത്തമുണ്ടായതായി സഊദി ഊര്‍ജ്ജ മന്ത്രി എഞ്ചിനീയര്‍ ഖാലിദ് അല്‍ ഫാലിഹ് അറിയിച്ചു.

എന്നാല്‍, ആക്രമണത്തില്‍ ആളപായമോ സഊദി എണ്ണ സംവിധാനങ്ങളില്‍ നാശ നഷ്ടങ്ങളോ ഉണ്ടായിട്ടില്ല. ശൈബ പ്രകൃതി വാതക ദ്രവീകരണ സംവിധാനത്തിന് നേരെ രാവിലെ നടന്ന ആക്രമണത്തില്‍ സഊദി അരാംകോ വിഭാഗം തീ നിയന്ത്രണ വിധേയമാക്കിയെന്നു കമ്പനി വൃത്തങ്ങള്‍ അറിയിച്ചു. കൂടുതല്‍ വിവരങ്ങള്‍ പിന്നീട് വെളിപ്പെടുത്തുമെന്ന് അരാംകോ വൃത്തങ്ങള്‍ അറിയിച്ചു.