നോയിഡ: കമ്മ്യൂണിക്കേഷന്‍ ഗ്യാപ്പ് എന്നൊരു പ്രയോഗമുണ്ട്. കൃത്യമായ ആശയവിനിമയം നടക്കാത്തതാണത്. ആറാം ക്ലാസ് കുട്ടി വീടുവിട്ടോടി ഫോണ്‍ വിളിച്ചപ്പോഴും അതു സംഭവിച്ചു.

നോയിഡയിലെ ഛിജാര്‍സി മേഖലയിലുള്ള 11 വയസ്സുകാരന്‍ രക്ഷിതാക്കളോടുള്ള ദേഷ്യത്തില്‍ വീടുവിട്ടിറങ്ങുകയായിരുന്നു. എന്നാല്‍ കുട്ടിയെ തട്ടിക്കൊണ്ടുപോയതാണെന്നു കരുതി പിതാവ് പൊലിസിനെ സമീപിക്കുകയും ചെയ്തു.

ഇതിനിടയില്‍ മകന്റെ ഫോണ്‍വിളിയെത്തി. ഉടനെ സമീപപ്രദേശമായ ബിസ്‌റാഖില്‍ എത്തണമെന്നു പറഞ്ഞായിരുന്നു ഫോണ്‍. 'അഞ്ചു മിനിറ്റി'ല്‍ എത്തണമെന്നു കൂടി മകന്‍ പറഞ്ഞു. എന്നാല്‍ പിതാവ് കേട്ടത് 'അഞ്ചു ലക്ഷം' രൂപയുമായി എത്തണമെന്നാണ്. പിന്നാലെ വിളിവന്ന മൊബൈല്‍ ഫോണ്‍ സ്വിച്ച്ഓഫ് ആവുകയും ചെയ്തു.

ഇതോടെ കഥമാറി. വിവരം പൊലിസിനെ അറിയിക്കുകയും ചെയ്തു. ഇതോടെ പൊലിസ് ഫോണ്‍ നമ്പര്‍ നിരീക്ഷിക്കാന്‍ തുടങ്ങി. വൈകാതെ ലോക്കല്‍ പൊലിസ് ബിസ്‌റാഖില്‍ എത്തുകയും ചെയ്തു. ഫോണ്‍ നമ്പര്‍ ലൊക്കേറ്റ് ചെയ്ത് എത്തിയപ്പോള്‍ ഒരു തൊഴിലാളിയുടെ അടുത്ത് നില്‍ക്കുന്ന കുട്ടിയെയാണ് കണ്ടത്.

കുട്ടിയെ തട്ടിക്കൊണ്ടുപോയതല്ലെന്ന് മനസ്സിലായ പൊലിസ് രക്ഷിതാക്കളെ വിളിച്ച് ഏല്‍പ്പിക്കുകയും ചെയ്തു. വീടുവിട്ടോടിയ കുട്ടി അപരിചിതന്റെ ബൈക്കില്‍ കയറി ബിസ്‌റാഖില്‍ എത്തുകയായിരുന്നു. സംഭവത്തില്‍ കേസ് രജിസ്റ്റര്‍ ചെയ്തിട്ടില്ല.