കോഴിക്കോട്: ദേശീയ ഭക്ഷ്യസുരക്ഷാ നിയമ പ്രകാരം ജില്ലയില്‍ മുന്‍ഗണനാ വിഭാഗത്തില്‍ ഉള്‍പ്പെട്ട അനര്‍ഹരെ കണ്ടെത്താന്‍ എല്ലാ സന്നദ്ധ സംഘടനകളുടെയും സഹായം അഭ്യര്‍ഥിച്ച് സപ്ലൈ ഓഫിസര്‍. ഇതുവരെ നടത്തിയ പരിശോധനകളില്‍ 25,000 റേഷന്‍ കാര്‍ഡുകള്‍ പൊതുവിഭാഗത്തിലേക്ക് മാറ്റി. ഇങ്ങനെയുണ്ടായ ഒഴിവുകളിലേക്ക് 26,282 റേഷന്‍കാര്‍ഡുകള്‍ മുന്‍ഗണനാ സബ്‌സിഡി വിഭാഗത്തിലേക്ക് മാറ്റുകയും ചെയ്തിട്ടുണ്ട്.
സംസ്ഥാനത്തുണ്ടായ പ്രളയക്കെടുതി കാരണം താല്‍ക്കാലികമായി നിര്‍ത്തിവച്ചിരുന്ന സ്‌ക്വാഡ് പ്രവര്‍ത്തനങ്ങള്‍ ശക്തമായി തുടരുമെന്ന് ജില്ലാ സപ്ലൈ ഓഫിസര്‍ അറിയിച്ചു. അര്‍ഹരല്ലാത്ത കാര്‍ഡുടമകള്‍ ഇനിയും മുന്‍ഗണനാ ലിസ്റ്റില്‍ തുടരുകയും ആനുകൂല്യങ്ങള്‍ കൈപറ്റുകയും ചെയ്യുന്നതായി ശ്രദ്ധയില്‍പെട്ടാല്‍ ഇതുവരെ വാങ്ങിച്ച ഭക്ഷ്യധാന്യങ്ങളുടെ വില ഈടാക്കും. പരിശോധനകള്‍ക്കായി ഓരോ താലൂക്കിലും പ്രത്യേക സ്‌ക്വാഡുകള്‍ രൂപീകരിച്ചിട്ടുണ്ട്. കൂടാതെ 1,000 ചതുരശ്ര അടിയിലധികം വീടും നാലുചക്ര വാഹനവുമുള്ളവരുടെ ലിസ്റ്റ് യഥാക്രമം പഞ്ചായത്ത് വകുപ്പില്‍ നിന്നും മോട്ടോര്‍വാഹന വകുപ്പില്‍ നിന്നും ലഭിച്ചതിന്റെ അടിസ്ഥാനത്തില്‍ അങ്ങനെയുള്ളവര്‍ക്ക് മൊബൈല്‍ സന്ദേശം അയച്ചിട്ടുണ്ട്.
അനര്‍ഹമായി അന്ത്യോദയ അന്നയോജനാ കാര്‍ഡുകള്‍ കൈവശംവയ്ക്കുന്നതായും സൗജന്യങ്ങള്‍ കൈപറ്റുന്നതായും ശ്രദ്ധയില്‍പെട്ടിട്ടുണ്ടെന്ന് സപ്ലൈ ഓഫിസര്‍ പറഞ്ഞു. ഇങ്ങനെ കണ്ടെത്തുന്നവരില്‍ നിന്ന് പിഴ ഈടാക്കുന്നതിനാവശ്യമായ നടപടികള്‍ എടുത്തുവരികയാണെന്നും സപ്ലൈ ഓഫിസര്‍ അറിയിച്ചു.