കല്‍പ്പറ്റ: നെല്‍ വര്‍ഷാചരണത്തിന്റെ ഭാഗമായി കൃഷി വകുപ്പ് നെല്‍കൃഷി പ്രോത്സാഹനത്തിനായി ഈ വര്‍ഷം ജില്ലയില്‍ 294.63 ലക്ഷം രൂപയുടെ പദ്ധതികള്‍ നടപ്പാക്കുന്നു.
ജില്ലയില്‍ 9000 ഹെക്ടര്‍ സ്ഥലത്ത് സുസ്ഥിര നെല്‍കൃഷി വികസനത്തിന് ഹെക്ടറിന് 1500 രൂപ വീതം 135 ലക്ഷം രൂപ ധനസഹായം നല്‍കും. പാടശേഖരാടിസ്ഥാനത്തില്‍ ഗ്രൂപ്പ് ഫാമിങ് നടത്തുന്ന കര്‍ഷകര്‍ക്ക് ഉല്‍പ്പാദനോപാധികള്‍ക്കായിട്ടാണ് ധനസഹായം അനുവദിക്കുന്നത്.
സവിശേഷ വിത്തിനങ്ങളുടെ പ്രോത്സാഹനത്തിനായി ഹെക്ടറിന് പതിനായിരം രൂപ തോതില്‍ ധനസഹായം അനുവദിക്കും.
ഞവര നെല്‍കൃഷി അഞ്ച് ഹെക്ടര്‍, ഗന്ധകശാല, ജീരകശാല 600 ഹെക്ടറിലും കൃഷി ചെയ്യുന്നതിനായി 60.50 ലക്ഷം രൂപയാണ് ധനസഹായം നല്‍കുന്നത്.
പാടശേഖര സമിതികള്‍ക്ക് ഗ്രൂപ്പ് ഫാങ്ങ് പ്രവര്‍ത്തനങ്ങള്‍ക്കായി ഓപ്പറേഷണല്‍ സപ്പോര്‍ട്ട് ആയി ഹെക്ടറിന് 360 രൂപ തോതില്‍ 4233 ഹെക്ടര്‍ സ്ഥലത്തേക്ക് 15.24 ലക്ഷം രൂപ ധനസഹായം അനുവദിക്കും.
50 ഹെക്ടര്‍ സ്ഥലത്ത് കരനെല്‍കൃഷി വികസനത്തിനായി ഹെക്ടറൊന്നിന് 13600 രൂപ തോതില്‍ ഏഴു ലക്ഷം രൂപ അനുവദിക്കും. തരിശുനില കൃഷി പ്രോത്സാഹിപ്പിക്കുന്നതിനായി 120 ഹെക്ടര്‍ സ്ഥലത്തേക്ക് ഹെക്ടറിന് 30000 രൂപ തോതില്‍ 36 ലക്ഷം രൂപ അനുവദിക്കും.
തരിശുനിലം പാട്ടത്തിനെടുത്ത് കൃഷി ചെയ്യുന്ന കര്‍ഷക കൂട്ടായ്മകള്‍, കുടുംബശ്രീ യൂനിറ്റുകള്‍ മുതലായവക്ക് ഹെക്ടറിന് 25000 രൂപ വീതവും സ്ഥലമുടമക്ക് ഹെക്ടറിന് 5000 രൂപയും അനുവദിക്കും.
കഴിഞ്ഞ വര്‍ഷം തരിശുനിലകൃഷി ചെയ്ത 127 ഹെക്ടര്‍ സ്ഥലത്ത് ഈ വര്‍ഷം കൃഷിയിറക്കുന്നതിന് ഹെക്ടറിന് 7000 രൂപ തോതില്‍ 8.89 ലക്ഷം രൂപയും അനുവദിച്ചിട്ടുണ്ട്. ജലസേചനം ലഭ്യമായ ഒരുവിള മാത്രം കൃഷി ചെയ്തിരുന്ന 80 ഹെക്ടര്‍ സ്ഥലം രണ്ടാംവിളകൂടി കൃഷി ചെയ്യുന്നതിന് ഹെക്ടറിന് 10000 രൂപ തോതില്‍ എട്ടു ലക്ഷം രൂപ ധനസഹായം അനുവദിക്കും. നഗരങ്ങളിലും വിദ്യഭ്യാസ സ്ഥാപനങ്ങളിലും നെല്‍കൃഷി പ്രോത്സാഹിപ്പിക്കുന്നതിനായി പദ്ധതിയടിസ്ഥാനത്തില്‍ നെല്‍കൃഷി ചെയ്യുന്നതിനായി അഞ്ചു ലക്ഷം രൂപ അനുവദിച്ചിട്ടുണ്ട്.
ഈ പദ്ധതികള്‍ ജില്ലയിലെ 26 കൃഷിഭവനുകളിലൂടെ കര്‍ഷകരുടെ പങ്കാളിത്തതോടെ നടപ്പാക്കാനാണ് തീരുമാനം.
വിവരങ്ങള്‍ക്കും ധനസഹായത്തിനുമായി കര്‍ഷകര്‍ പ്രദേശത്തെ കൃഷിഭവനുകളുമായി ബന്ധപ്പെടണം.