കോഴിക്കോട്: ഇരിങ്ങല്‍ കോട്ടക്കല്‍ കുഞ്ഞാലി മരക്കാര്‍ സ്മാരക മ്യൂസിയത്തിന്റെ സംരക്ഷണപ്രവൃത്തികള്‍ പുരോഗമിക്കുന്നു. ഒന്നാംഘട്ട സംരക്ഷണ പ്രവൃത്തിക്കായി 18 ലക്ഷം രൂപയാണു ചെലവഴിക്കുന്നത്. ടിക്കറ്റ് കൗണ്ടര്‍, മേല്‍ക്കൂര മോടിപിടിപ്പിക്കല്‍, തറയോട് സംരക്ഷണം, പ്ലാസ്റ്ററിങ്, ഭിന്നശേഷി സൗഹൃദ ടോയ്‌ലറ്റ് നിര്‍മാണം എന്നിവയാണ് ഒന്നാം ഘട്ടത്തിലുള്ളത്.
മ്യൂസിയത്തോടു ചേര്‍ന്ന പയ്യോളി നഗരസഭയുടെ ഉടമസ്ഥതയിലുളള സ്ഥലം ലഭ്യമാക്കാനുള്ള നടപടികളും പുരോഗമിക്കുകയാണ്. സംരക്ഷണപ്രവൃത്തി പൂര്‍ത്തിയാകുന്നതോടെ പലഭാഗങ്ങളില്‍ നിന്നും കിട്ടിയ ശിലാഫലകങ്ങളും മറ്റും ശാസ്ത്രീയമായ രീതിയില്‍ പ്രദര്‍ശിപ്പിക്കാനും ഇതോടൊപ്പം പദ്ധതിയുണ്ട്. സ്ഥലപരിമിതി ഉണ്ടെങ്കിലും വിദ്യാര്‍ഥികളും ഇതരസംസ്ഥാനക്കാരും വിദേശികളുമൊക്കെയായി നിരവധി പേരാണ് മ്യൂസിയം സന്ദര്‍ശിക്കുന്നതിനായി എത്തുന്നത്. കൊയിലാണ്ടി എം.എല്‍.എ കെ. ദാസന്റെയും മ്യൂസിയം പുരാവസ്തു വകുപ്പ് മന്ത്രി കടന്നപ്പള്ളി രാമചന്ദ്രന്റെയും ശ്രമഫലമായാണ് മ്യൂസിയത്തിനു പുതുജീവന്‍ പകര്‍ന്നത്.