പൊന്നാനി:  കാലവര്‍ഷം ശക്തമാക്കും മുമ്പേ ചമ്രവട്ടം റഗുലേറ്ററിന്റെ ഷട്ടറുകള്‍ അധികൃതര്‍ തുറന്നു. റഗുലേറ്ററിന്റെ 60 ഷട്ടറുകളാണ് ഇന്നലെ തുറന്നത് .
മഴക്കാലമായാല്‍ റഗുലേറ്ററുകളുടെ ഷട്ടറുകള്‍ തുറന്നിടണമെന്നുള്ളതുകൊണ്ടാണ് ഷട്ടറുകള്‍ തുറന്നതെന്നാണ് അധികൃതര്‍ പറയുന്നത് . ആവശ്യത്തിന് മഴ ലഭിച്ച് ജലസ്രോതസ്സുകള്‍ നിറയുന്നതിന് മുമ്പേ ഷട്ടറുകള്‍ തുറന്നത്  പ്രദേശവാസികള്‍ ആശങ്കയുണ്ടാക്കിയിട്ടുണ്ട് . കഴിഞ്ഞ രണ്ട് ദിവസമായി മഴ ശക്തമായതോടെയാണ് കൂടുതല്‍ ഷട്ടറുകള്‍ തുറന്നത്. ഷട്ടറുകള്‍ തുറക്കാന്‍ സാധ്യതയുണ്ടെന്നും തീരങ്ങളിലുള്ളവര്‍ ജാഗ്രത പുലര്‍ത്തണമെന്നും അധികൃതര്‍ അറിയിച്ചിരുന്നു. നാല് മീറ്റര്‍ വരെ ഉയരത്തില്‍ വെള്ളം സംഭരിച്ച് നിര്‍ത്താന്‍ ചമ്രവട്ടം റഗുലേറ്ററിന് ശേഷിയുണ്ട് . കഴിഞ്ഞ ദിവസം ജലനിരപ്പ് 3 മിറ്റര്‍ ഉയരത്തിലെത്തിയപ്പോഴാണ് ഷട്ടറുകള്‍ തുറന്നത്.
വൈകുന്നേരത്തോടെ ജലനിരപ്പ് താഴുമെങ്കിലും കൂടുതല്‍ ഷട്ടറുകള്‍ തുറക്കുകയായിരുന്നു . മഴതുടങ്ങിയതോടെ തൂതപ്പുഴയില്‍ നിന്ന് വെള്ളം ഭാരതപ്പുഴയിലേക്കൊഴുകുന്നുണ്ടെന്നും വെള്ളിയാങ്കല്ല് റഗുലേറ്ററിന്റെ ഷട്ടറുകള്‍ തുറക്കുകയാണെങ്കില്‍ രണ്ട് ദിവസത്തിനകം ചമ്രവട്ടത്തെ മുഴുവന്‍ ഷട്ടറുകളും തുറക്കുമെന്നുമാണ് അധികൃതര്‍ പറയുന്നത് .70 ഷട്ടറുകളാണ് ചമ്രവട്ടം റഗുലേറ്ററിനുള്ളത് . ഭാരതപ്പുഴ കുറ്റിപ്പുറം ഭാഗത്തൊന്നും ഇപ്പോഴും പരന്നൊഴുകാന്‍ തുടങ്ങിയിട്ടില്ലെന്നിരിക്കെ ധൃതിപിടിച്ച് ഷട്ടറുകള്‍ തുറന്ന അധികൃതരുടെ നടപടിയാണ് നാട്ടുകാര്‍ ചോദ്യം ചെയ്യുന്നത്. സംഭരണിശേഷിക്കനുസരിച്ച് വെള്ളം തടഞ്ഞു നിര്‍ത്താന്‍ റഗുലേറ്ററിന് കഴിയുന്നില്ലെന്ന് അധികൃതര്‍ സമ്മതിക്കുന്നു. നിലവില്‍ ചമ്രവട്ടം പദ്ധതി വെറും പാലമായി മാറിയ സ്ഥിതിയാണിപ്പോള്‍. റഗുലേറ്ററിന്റെ ഷട്ടറുകള്‍ക്ക് വ്യാപകമായ ചോര്‍ച്ച ഉള്ളതിനാല്‍ വേനല്‍ക്കാലത്ത് പോലും വെള്ളം സംഭരിച്ച് നിര്‍ത്താന്‍ ചമ്രവട്ടം പദ്ധതിക്ക് കഴിഞ്ഞിരുന്നില്ല.