നെയ്യാറ്റിന്‍കര: നെയ്യാറ്റിന്‍കരയില്‍ പ്രവര്‍ത്തിക്കുന്ന തൃശൂര്‍ ഫാഷന്‍ ജുവലറിയില്‍ നിന്ന് കഴിഞ്ഞമാസം 23ന് സ്വര്‍ണം വാങ്ങാനെന്ന വ്യാജേന എത്തുകയും 32 ഗ്രാം തൂക്കം വരുന്ന നാല് വളകള്‍ കവര്‍ന്ന് സ്ഥലം വിടുകയും ചെയ്ത കേസിലെ രണ്ട് തമിഴ്‌നാട് സ്വദേശികളായ സ്ത്രീകളെ ഇന്നലെ നെയ്യാറ്റിന്‍കര പൊലിസ് അറസ്റ്റ് ചെയ്തു. ഇവര്‍ അന്ന് കവര്‍ച്ച നടത്തിയ ദൃശ്യം സി.സി കാമറയില്‍ പതിഞ്ഞിരുന്നു.
സംഭവ ശേഷമാണ് കവര്‍ച്ച ജീവനക്കാരുടെ ശ്രദ്ധയില്‍പെട്ടത്. തുടര്‍ന്ന് സ്ഥാപനം പൊലിസില്‍ പരാതിയും നല്‍കിയിരുന്നു. പൊലിസ് അന്വേഷണം നടത്തി വരുന്നതിനിടെ മോഷ്ടാക്കളായ സ്ത്രീകള്‍ ഇന്നലെ വീണ്ടും ജുവലറിയില്‍ സ്വര്‍ണം വാങ്ങാനെന്ന വ്യാജേന എത്തുകയും ജീവനക്കാര്‍ ഇവരെ തടഞ്ഞു വച്ച് പൊലിസില്‍ ഏല്‍പ്പിക്കുകയുമായിരുന്നു.