കോഴിക്കോട്: ജില്ലയില്‍ മാനസികരോഗികള്‍ക്ക് പുതിയ പുനരധിവാസ കേന്ദ്രം തുടങ്ങുന്നു. നഗരത്തിലെ അലഞ്ഞു തിരിയുന്നവരടക്കമുള്ളവരില്‍ മാനസികാസ്വാസ്ഥ്യമുള്ളവര്‍ക്ക് കൂടി ഈ കേന്ദ്രം തുണയാകും. കുതിരവട്ടം മാനസികാരോഗ്യ കേന്ദ്രം മാത്രമാണ് ഇപ്പോള്‍ നിലവിലുള്ള വിപുലമായ ചികിത്സാ കേന്ദ്രം.
ഇതിനകത്ത് പുനരധിവാസ കേന്ദ്രം ഉണ്ടെങ്കിലും അസുഖം മാറിയവരെ പുനരധിവസിക്കാന്‍ മതിയായ കേന്ദ്രങ്ങളില്ലാത്ത അവസ്ഥയാണ്. ഇതുമൂലം അസുഖം മാറിയാലും ആശുപത്രിയില്‍ തന്നെ തുടരേണ്ട ഗതികേടിലുമാണ് രോഗം മാറിയവര്‍. വിവിധ ജില്ലകളിലുള്ള നിരവധി പേരാണു രോഗം മാറിയിട്ടും ബന്ധുക്കള്‍ ഏറ്റെടുക്കാനാളില്ലാതെ കുതിരവട്ടം മാനസികാരോഗ്യ കേന്ദ്രത്തില്‍ ഇപ്പോഴും കഴിയുന്നത്. ഇത്തരക്കാര്‍ക്കും ഈ കേന്ദ്രം തുണയാകുമെന്നാണു പ്രതീക്ഷിക്കുന്നത്.
'ശ്രദ്ധാഭവന്‍' എന്നാണ് തുടങ്ങാന്‍ പോകുന്ന കേന്ദ്രത്തിനു പേരിട്ടിരിക്കുന്നത്. പുനരധിവാസ കേന്ദ്രം നിര്‍മിക്കുന്നതിനായി വിശദമായ പ്രൊജക്ട് റിപ്പോര്‍ട്ട് സര്‍ക്കാരിനു സമര്‍പ്പിക്കാന്‍ ജില്ലാ പഞ്ചായത്ത് ഹാളില്‍ ചേര്‍ന്ന യോഗം തീരുമാനിച്ചു. ജില്ലാ പഞ്ചായത്തിന്റെ ആറേക്കര്‍ ഭൂമിയില്‍ എല്ലാവിധ അടിസ്ഥാന സൗകര്യങ്ങളോടും കൂടി കെട്ടിടസമുച്ചയം നിര്‍മിക്കാനാണു ലക്ഷ്യമിടുന്നത്. പുരുഷന്മാര്‍ക്കും സ്ത്രീകള്‍ക്കും വെവ്വേറെ സൗകര്യങ്ങളാണ് ഒരുക്കുക. പ്രളയത്തിലുണ്ടായ നാശനഷ്ടങ്ങള്‍ പരിഹരിക്കാന്‍ ഗ്രാമീണ തൊഴിലുറപ്പ് പദ്ധതിയുടെ ഭാഗമായി നിര്‍മാണ മേഖലയില്‍ കൂടുതല്‍ പദ്ധതികള്‍ നടപ്പാക്കാനും യോഗം തീരുമാനിച്ചു.