കൊല്ലം: അഷ്ടമുടിക്കായലിലെ മാലിന്യം സംബന്ധിച്ച് കൊല്ലം ലീഗല്‍ സര്‍വിസസ് അതോരിറ്റിയില്‍ ലഭിച്ച ഹരജിയുടെ തുടര്‍ നടപടികളുടെ ഭാഗമായി ജില്ലാ ലീഗല്‍ സര്‍വിസസ് അതോരിറ്റി സെക്രട്ടറി സബ് ജഡ്ജ് സുധാകാന്ത് പൈ സ്ഥലപരിശോധന നടത്തി. കോര്‍പ്പറേഷനിലെ ഹെല്‍ത്ത് വിഭാഗം ഉദ്യോഗസ്ഥരും ഹര്‍ജി കക്ഷികളായ അഡ്വ. ബോറിസ് പോള്‍, അഡ്വ. രാഹുല്‍ വി.ഐ എന്നിവരും ഒപ്പമുണ്ടായിരുന്നു.
കെ.എസ്.ആര്‍.ടി.സി ബസ് സ്റ്റേഷന് സമീപത്തെ കായല്‍ ഭാഗത്ത് അടിഞ്ഞുകൂടിയ മാലിന്യത്തിന്റെ അവസ്ഥ സബ് ജഡ്ജ് നേരിട്ട് കണ്ട് ബോധ്യപ്പെട്ടു. മദ്യക്കുപ്പികളുടെ കൂമ്പാരമായിരുന്നു അവിടെ. ഗാര്‍ഹിക മാലിന്യങ്ങള്‍ കൂടാതെ കച്ചവട, വ്യവസായ സ്ഥാപനങ്ങളിലെ മാലിന്യങ്ങളും നിക്ഷേപിക്കപ്പെട്ടിരുന്നു. വീടുകളിലെയും മറ്റും മനുഷ്യ മാലിന്യങ്ങള്‍ ഓവുകളിലൂടെ നേരിട്ട് കായലിലേക്ക് ഒഴുക്കുന്നതായി ശ്രദ്ധയില്‍പെട്ടതിനെ തുടര്‍ന്ന് ബന്ധപ്പെട്ടവര്‍ക്ക് നോട്ടീസ് നല്‍കിയതായി കോര്‍പ്പറേഷന്‍ അധികൃതര്‍ അറിയിച്ചു. ഡി.ടി.പി.സി, പി.ഡബ്ല്യു.ഡി, പൊലിസ്, കോസ്റ്റല്‍ സോണ്‍ മാനേജ്‌മെന്റ് അതോരിറ്റി, സ്റ്റേറ്റ് വെറ്റ്‌ലാന്‍ഡ് അതോരിറ്റി,
ഡയരക്ടറേറ്റ് ഓഫ് എന്‍വയോണ്‍മെന്റ് ആന്‍ഡ് ക്ലൈമറ്റ് ചേഞ്ച് എന്നീ സ്ഥാപനങ്ങളെക്കൂടി കേസില്‍ കക്ഷി ചേര്‍ക്കാന്‍ ലീഗല്‍ സര്‍വിസസ് അതോരിറ്റി ഹരജി കക്ഷികള്‍ക്ക് നിര്‍ദേശം നല്‍കി. മാലിന്യം ഉടനെ നീക്കം ചെയ്യാനും മേലില്‍ മാലിന്യം ശേഖരിക്കപ്പെടുന്നത് ഒഴിവാക്കാനും സാധ്യമായ നടപടികള്‍ വിശദീകരിച്ച് റിപ്പോര്‍ട്ട് നല്‍കാന്‍ സബ് ജഡ്ജ് വിവിധ വകുപ്പുകളോട് നിര്‍ദേശിച്ചു. കേസ് നവംബറില്‍ വീണ്ടും പരിഗണിക്കും.