ഇരിട്ടി: ഒരാഴ്ച്ച മുന്‍പ് വീശിയടിച്ച ശക്തമായ കാറ്റിനെ തുടര്‍ന്ന് ഇരിട്ടി ടൗണില്‍ മുറിഞ്ഞു വീണ മരച്ചില്ലകളും മുറിച്ചുമാറ്റിയ ശിഖരങ്ങളും നീക്കം ചെയ്യാത്തത് ദുരിതമാകുന്നു. ഒടിഞ്ഞു വീണഭാഗത്ത് തന്നെ മരച്ചില്ലകള്‍ കൂട്ടിയിട്ടതിനാല്‍ വാഹനയാത്രക്കാര്‍ക്കും വ്യാപാരികള്‍ക്കുമാണ് ബുദ്ധിമുട്ടുണ്ടാകുന്നത്.
ശക്തമായ കാറ്റില്‍ മരച്ചില്ലകള്‍ വീണതിനെ തുടര്‍ന്ന് മരത്തിനു താഴെ പാര്‍ക്ക് ചെയ്തിരുന്ന നിരവധി ബൈക്കുകളടക്കമുള്ള വാഹനങ്ങള്‍ തകരുകയും കേടുപാടു സംഭവിക്കുകയും ചെയ്തിരുന്നു. തുടര്‍ന്ന് ഇരിട്ടി ഫയര്‍ഫോഴ്‌സ് സ്ഥലത്തെത്തി മരം മുറിച്ചുമാറ്റി ഗതാഗതം പുനസ്ഥാപിച്ചെങ്കിലും മരച്ചില്ലകള്‍ നഗരസഭാ അധികൃതര്‍ നീക്കം ചെയ്തിട്ടില്ല. ഇരിട്ടി നഗരത്തില്‍ വാഹനപ്പെരുപ്പം മൂലം വാഹനങ്ങള്‍ പാര്‍ക്ക് ചെയ്യാന്‍ ബുദ്ധിമുട്ടുമ്പോഴാണ് ടാക്‌സി വാഹനങ്ങള്‍ക്ക് പാര്‍ക്ക് ചെയ്യാന്‍ ഒരുക്കിയ സ്ഥലത്ത് മരച്ചില്ലകള്‍ മാറ്റാതെ കൂട്ടിയിട്ടിരിക്കുന്നത്. അധികൃതരുടെ അനാസ്ഥക്കെതിരേ വ്യാപക ജനകീയ പ്രതിഷേധം ഉയരുകയാണ്.