പള്ളിക്കല്‍: അങ്കണവാടികളില്‍നിന്ന് പഴകിയ ഭക്ഷ്യ വസ്തുക്കള്‍ വിതരണെ ചെയ്യുന്നതിനെതിരെ പ്രതിഷേധവുമായി നാട്ടുകാര്‍. കഴിഞ്ഞ ദിവസം പള്ളിക്കല്‍ പഞ്ചായത്ത് 15-ാം വാര്‍ഡിലെ ആണൂര്‍ കൊളങ്ങോട്ട് അങ്കണവാടിയിന്‍ നിന്നും ഗുണഭോക്താക്കള്‍ക്ക് വിതരണം ചെയ്തത് ഉപയോഗശൂന്യമായ പഴകിയ നിലയിലുള്ള ശര്‍ക്കരയാണ്. പരാതിപ്പെട്ടിട്ടാലും പരിഹാരമുണ്ടാകാറില്ലെന്ന് നാട്ടുകാര്‍ പറയുന്നു. മുലയൂട്ടുന്ന അമ്മമാര്‍ക്കും കൗമാരക്കാര്‍ക്കും നല്‍കുന്ന മുത്താറി, ഗോതമ്പ് തുടങ്ങിയ ഭക്ഷ്യധാന്യങ്ങള്‍ ഉള്‍പ്പെടെ വിവിധ അങ്കണവാടികളില്‍ നിന്നും പലപ്പോഴും ഇത്തരത്തില്‍ ഉപയോഗശ്യൂന്യമായ ഭക്ഷ്യവസ്തുക്കള്‍ ലഭിക്കാറുണ്ടെന്നും ബന്ധപ്പെട്ട അധികാരികളുടെ അനാസ്ഥയാണ് ഇതിന് കാരണമെന്നും നാട്ടുകാര്‍ ആരോപിക്കുന്നു.
പരാതിപ്പെട്ടിട്ടും പ്രയോജനമില്ലാത്തതിനാല്‍ ഇത്തരത്തില്‍ ലഭിക്കുന്ന ഭക്ഷ്യവസ്തുക്കള്‍ ഒഴിവാക്കുകയാണ് ചെയ്യാറെന്നും എന്നാല്‍ അങ്കണവാടിയിലെത്തുന്ന കുരുന്നുകള്‍ക്ക് ഇത്തരം ഭക്ഷ്യവസ്തുക്കള്‍ ഉപയോഗിച്ചുണ്ടാക്കുന്ന ഭക്ഷണങ്ങള്‍ നല്‍കുന്നത് കടുത്ത ആരോഗ്യ പ്രശ്‌നങ്ങള്‍ക്ക് കാരണമാകുമെന്നും ഇതില്‍ ആശങ്കയുണ്ടെന്നും നാട്ടുകാര്‍ പറയുന്നു. ഹോട്ടലുകള്‍ ഉള്‍പ്പെടെയുള്ള കടകളിലും മാര്‍ക്കറ്റുകളിലും ഭക്ഷ്യവസ്തുക്കളുടെ പരിശോധനക്കത്തുന്ന ആരോഗ്യ വകുപ്പ് അധികൃതര്‍ സ്‌കൂളുകളിലും അങ്കണവാടികളിലും പരിശോധന നടത്താന്‍ തയാറാകണമെന്നും നാട്ടുകാര്‍ ആവശ്യപ്പെട്ടു.