മലപ്പുറം: സംസ്ഥാന സര്‍ക്കാറിനെ വലിച്ച് താഴെയിടുമെന്ന് പറയുന്നതിന്റെ പകുതി ശൗര്യം ബി.ജെ.പി ദേശീയ അധ്യക്ഷന്‍ അമിത്ഷാ ശബരിമല വിഷയത്തില്‍ നിയമം കൊണ്ടുവരുന്നതിന് കാണിച്ചിരുന്നെങ്കില്‍ പ്രശ്‌നം പരിഹരിക്കാമായിരുന്നുവെന്ന് പി.കെ കുഞ്ഞാലിക്കുട്ടി എം.പി. മലപ്പുറത്ത് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.

സുപ്രിംകോടതി വിധി മറികടക്കാന്‍ നിയമം കൊണ്ടുവരിക എന്നത് കേന്ദ്രത്തിന് അസാധ്യമായ കാര്യമല്ല. സി.പി.എമ്മിനും ബി.ജെ.പിക്കും ശബരിമല രാഷ്ട്രീയവിഷയമാണ്. ഇതില്‍ രണ്ട് കൂട്ടര്‍ക്കും നേട്ടമുണ്ട്. ആ നേട്ടം ഇരുപാര്‍ട്ടികളും ചേര്‍ന്ന് വീതിക്കുകയാണ്. ഒരു വിഭാഗം രാഷ്ട്രീയവല്‍കരിക്കുമ്പോള്‍ മറ്റൊരു കൂട്ടര്‍ വര്‍ഗീയവല്‍ക്കരിക്കാനാണ് ശ്രമിക്കുന്നത്.

കേന്ദ്ര,സംസ്ഥാന സര്‍ക്കാരുകള്‍ക്ക് ഈ വിഷയത്തില്‍ ചെയ്യാവുന്ന ഒരുപാട് കാര്യങ്ങളുണ്ട്. എന്നാല്‍, ഒത്തുകളി രാഷ്്ട്രീയം നടത്തി ഇരുവരും പ്രശ്‌നം വഷളാക്കുകയാണ്. മിതത്വം പാലിച്ച് പ്രശ്‌നം പരിഹരിക്കണമെന്ന യു.ഡി.എഫ് നിലപാടിന് ഒപ്പമായിരിക്കും ജനമെന്നും കുഞ്ഞാലിക്കുട്ടി പറഞ്ഞു.