മാനന്തവാടി: കുറുവ ദ്വീപിലെ ചങ്ങാട സവാരിക്ക് പ്രിയമേറിയതോടെ കൂടുതല്‍ സൗകര്യങ്ങള്‍ ഒരുക്കാന്‍ നടപടിയുമായി അധികൃതര്‍. കഴിഞ്ഞ വര്‍ഷം ദ്വീപില്‍ എത്തുന്ന സഞ്ചാരികള്‍ക്ക് വനം വകുപ്പ് നിയന്ത്രണം ഏര്‍പ്പെടുത്തിയതോടെയാണ് ജില്ലാ ടൂറിസം പ്രമോഷന്‍ കൗണ്‍സില്‍ ചങ്ങാട സവാരി ആരംഭിച്ചത്. ഈ വര്‍ഷം മഴയെ തുടര്‍ന്ന് നിര്‍ത്തിവച്ച സര്‍വിസ് സെപ്റ്റംബര്‍ 21 നാണ് പുനഃരാരംഭിച്ചത്.
തുടര്‍ന്ന് ഇക്കഴിഞ്ഞ 28 വരേയുള്ള 39 ദിവസം 2758 സഞ്ചാരികളാണ് ചങ്ങാട സവാരിക്കെത്തിയത്. 1,76500 രൂപ വരുമാനവും ലഭിച്ചു. ഏറ്റവും അധികം വരുമാനം ലഭിച്ചത് നവമി ദിവസമായ ഒക്ടോബര്‍ 19നാണ്, 15975 രൂപയാണ് അന്നത്തെ വരുമാനം. തൊട്ടടുത്ത ദിവസമായ വിജയദശമി ദിനത്തില്‍ 15595 രൂപയും ലഭിച്ചു. അഞ്ച് ചെറുതും രണ്ട് വലിയ ചങ്ങാടങ്ങളുമാണ് സവാരിക്കായി സജ്ജീകരിച്ചിട്ടുള്ളത്. അഞ്ച് പേര്‍ക്ക് 300 രൂപയാണ് ഫീസ്. അഞ്ച് പേര്‍ക്ക് സ്വയം തുഴഞ്ഞ് പോകാവുന്ന ചങ്ങാടത്തില്‍ ഒരാള്‍ക്ക് 1000 രൂപയാണ് ഈടാക്കുന്നത്. രണ്ട് പേര്‍ക്ക് കയറാവുന്നവക്ക് 150 രൂപ വീതമാണ് ഈടാക്കുന്നത്. 40 മിനിറ്റ് നേരമാണ് കറങ്ങാനുള്ള സമയം. കഴിഞ്ഞ വര്‍ഷം വരെ ദ്വീപില്‍ വരുന്ന സഞ്ചാരികള്‍ക്ക് നിയന്ത്രണമുണ്ടായിരുന്നില്ല. നിയന്ത്രണം ഏര്‍പ്പെടുത്തിയതോടെ വന്‍ പ്രതിഷേധമാണ് ഉയര്‍ന്നത്.
സി.പി.എം, സി.പി.ഐ പോരില്‍ വരെ വിഷയം എത്തിയിരുന്നു. ഒടുവില്‍ 1050 പേരെ ഒരു ദിവസം കടത്തിവിടാമെന്ന ധാരണയില്‍ എത്തുകയും അതു പ്രകാരം മഴക്കാലം വരെ തുടരുകയും ചെയ്തു. മഴ മാറിയതോടെ വനം വകുപ്പ് എന്ത് നിലപാട് സ്വീകരിക്കുമെന്ന കാര്യത്തില്‍ ആശങ്ക നിലനില്‍ക്കുന്നുണ്ട്. അതിനിടെ ചാര്‍ജെടുത്തതിന് ശേഷം ആദ്യമായി കുറുവയില്‍ എത്തിയ ജില്ലാ കലക്ടര്‍ എ. അജയകുമാര്‍ കൂടുതല്‍ ചങ്ങാടങ്ങള്‍ ഏര്‍പ്പെടുത്തുമെന്നും അടിസ്ഥാന സൗകര്യങ്ങള്‍ വര്‍ധിപ്പിക്കുമെന്നും പറഞ്ഞു. ഫിനാന്‍സ് ഓഫിസര്‍ ദിനേശന്‍ ഡി.ടി.പി.സി മെംബര്‍ സെക്രട്ടറി. ജി. ആനന്ദ്, ലൂക്ക ഫ്രാന്‍സിസ്, കുറുവ മാനേജര്‍ വി.ജെ ഷിജു എന്നിവരും അദ്ദേഹത്തിനൊപ്പമുണ്ടായിരുന്നു.