സുല്‍ത്താന്‍ ബത്തേരി: ജില്ലയിലെ കമ്മിറ്റഡ് സോഷ്യല്‍ വര്‍ക്കര്‍മാരെ മറ്റ് ജില്ലകളിലേക്ക് സ്ഥലംമാറ്റിയ ട്രൈബല്‍വകുപ്പ് നടപടിക്കെതിരേ പ്രതിഷേധം. ജില്ലയില്‍ ആകെയുള്ള 15 വര്‍ക്കര്‍മാരില്‍ 10 പേരെ മാറ്റിയ നടപടിയാണ് പ്രതിഷേധത്തിന് കാരണമായത്.
ജില്ലയിലെ ആദിവാസി മേഖലകളിലെ സമഗ്രപുരോഗമന പ്രവര്‍ത്തനങ്ങള്‍ക്കായി കഴിഞ്ഞ സര്‍ക്കാര്‍ ഇവരെ നിയമിച്ചത്. ആദിവാസസി സമൂഹം ഏറെയുള്ള ജില്ലയില്‍ 26 പേരായിരുന്നു ഈ വിഭാഗത്തില്‍ ജോലി ചെയ്തിരുന്നത്. ഇതില്‍ 11പേര്‍ സ്വമേധയാ പിരിഞ്ഞുപോയി. ബാക്കി ഉണ്ടായിരുന്ന 15ല്‍ പത്ത് പേരെയാണ് മറ്റ് ജില്ലകളിലേക്ക് മാറ്റിയത്. സര്‍ക്കാര്‍ പദ്ധതികളും സേവനങ്ങളും ആദിവാസി സമൂഹത്തില്‍ എത്തിക്കുക എന്ന ലക്ഷ്യത്തോടെയായിരുന്നു ഇവരെ ജില്ലയില്‍ നിയമിച്ചത്.
ഈ പ്രവര്‍ത്തനമാണ് വര്‍ക്കര്‍മാരെ മാറ്റിയതിലൂടെ നിലച്ചിരിക്കുന്നത്.
മാറ്റിയ വര്‍ക്കര്‍മാരില്‍ മൂന്ന് പേര്‍ വയനാട് ജില്ലക്കാര്‍ കൂടിയാണ്. ഈ നടപടി ആദിവാസികളോട് കാണിക്കുന്ന അവഗണനയാണന്നും നടപിടക്കെതിരെ വകുപ്പ് മന്ത്രിക്ക് കത്ത് നല്‍കുമെന്നും ഐ.സി ബാലകൃഷ്ണന്‍ എം.എല്‍.എ പറഞ്ഞു.