മീനങ്ങാടി: തെരുവുനായ ശല്യത്തില്‍ പൊറുതി മുട്ടി മധുകൊല്ലി നിവാസികള്‍. ദേശീയ പാതയില്‍ നിന്നും മധുകൊല്ലിയിലേക്കുള്ള പാത തെരുവുനായ്ക്കള്‍ കൈയടിക്കയതോടെ മദ്‌റസയിലേക്കും സ്‌കൂളിലേക്കുമുള്ള വിദ്യാര്‍ഥികള്‍ ഉള്‍പ്പെടെ ഭീതിയോടെയാണ് ഇതുവഴി സഞ്ചരിക്കുന്നത്. ഇരുചക്ര വാഹനങ്ങളെ നായകള്‍ പിന്തുടരുന്നതും അപകടത്തിന് കാരണമാകുന്നുണ്ട്.
കോഴികളടക്കമുള്ള വളര്‍ത്തു പക്ഷികളെയും മൃഗങ്ങളെയും കൂട്ടമായി അക്രമിച്ചു മുറിവേല്‍പ്പിക്കുന്നതും കടിച്ചു കൊല്ലുന്നതും പതിവായിരിക്കുകയാണ്. കൂളിയോടന്‍ മൊയ്തീന്‍ കുട്ടിയുടെ ഒരുവയസോളം പ്രായമായ ആടിനെ തെരുവുനായകള്‍ കൂട്ടമായി കടിച്ചു കൊന്നതാണ് ഒടുവിലത്തെ സംഭവം.
മുന്‍പ് ഈ ആടിനെ തെരുവ് നായ കടിച്ച് മുറിവേല്‍പ്പിച്ചിരുന്നു. പരുക്ക് ഭേദമായി വരുന്നതിനിടെയാണ് വീണ്ടും ആടിനെ തെരുവുനായകള്‍ അക്രമിച്ചത്.