കോട്ടയം: സി.പി.ഐ മുന്‍ ദേശീയ ജനറല്‍ സെക്രട്ടറി എ ബി ബര്‍ദന്റെ നിര്യാണത്തില്‍ രാഷ്ട്രീയ നേതാക്കള്‍ അനുശോചനമര്‍പ്പിച്ചു. സമാനതകളില്ലാത്ത സമരജീവിതത്തിനുദാഹരണമായിരുന്നു സഖാവ് എ.ബി ബര്‍ദനെന്ന് സി.പി.ഐ ജില്ലാ സെക്രട്ടറി സി കെ ശശിധരന്‍ അനുസ്മരിച്ചു.
ഇടതുപക്ഷ പ്രസ്ഥാനത്തിനും കമ്യൂണിസ്റ്റ് പാര്‍ട്ടിക്കും നഷ്ടപ്പെട്ടത് കരുത്തനായ നേതാവിനെയാണെന്ന്  സി.പി.ഐ സംസ്ഥാന എക്‌സിക്യൂട്ടീവ് അംഗം പി കെ കൃഷ്ണന്‍ പറഞ്ഞു. ഇന്ത്യന്‍ രാഷ്ട്രീയത്തില്‍ നിറഞ്ഞുനിന്ന കരുത്തനായ പോരാളിയായിരുന്നു ബര്‍ദനെന്ന് സി.പി.ഐ സംസ്ഥാന എക്‌സിക്യൂട്ടീവ് അംഗം അഡ്വ വി ബി ബിനു പറഞ്ഞു.
ബര്‍ദന്റെ നിര്യാണത്തില്‍ കിസാന്‍സഭ ജില്ലാ കൗണ്‍സില്‍ അനുശോചനം രേഖപ്പെടുത്തി. സി.പി.ഐ കോട്ടയം ജില്ലാ കൗണ്‍സിലിന്റെ നേതൃത്വത്തില്‍ അനുശോചന സമ്മേളനം സംഘടിപ്പിക്കും. ഇന്ന് വൈകുന്നേരം 5.30ന് പഴയ പൊലീസ്റ്റേഷന്‍ മൈതാനത്ത് ചേരുന്ന സമ്മേളനത്തില്‍ രാഷ്ട്രീയ, സാംസ്‌ക്കാരിക, സാമൂഹിക രംഗത്തെ പ്രമുഖര്‍ പങ്കെടുക്കും.