കോഴിക്കോട്: ഹരിതകാന്തിയില്‍ ഒളിപ്പിച്ചുവച്ച ഒരു വലിയ വിസ്മയമാണ് മൊണ്‍ടാന എസ്റ്റേറ്റ്. ഇനി മുതല്‍ ഇവിടെയാകും മലബാര്‍ ഗ്രൂപ്പിന്റെ ആസ്ഥാന മന്ദിരം. കോഴിക്കോട് നഗരത്തില്‍ നിന്ന് 13 കിലോമീറ്റര്‍ അകലെ കുറ്റിക്കാട്ടൂരിലെ 150 ഏക്കര്‍ ഭൂമിയിലാണ് മൊണ്‍ടാന എസ്റ്റേറ്റ്. സമുദ്ര നിരപ്പില്‍നിന്ന് 800 അടി ഉയരത്തില്‍ കുറ്റിക്കാട്ടൂരില്‍നിന്ന് പെരിങ്ങൊളത്തേക്കുള്ള റോഡരികിലാണ് ഈ പുതിയ ടൗണ്‍ഷിപ്പ് ഒരുങ്ങുന്നത്.
മലകള്‍ക്കും മരങ്ങള്‍ക്കും പരുക്കേല്‍ക്കാതെ ഇവിടെ ഒരുക്കിയിരിക്കുന്ന ടൗണ്‍ഷിപ്പില്‍ മലബാര്‍ ഗ്രൂപ്പിന്റെ ആസ്ഥാനത്തിനു പുറമെ സിഗ്നേച്ചര്‍ ബംഗ്ലാവുകളും വില്ലകളും അപ്പാര്‍ട്ട്‌മെന്റുകളും ഇന്റര്‍നാഷനല്‍ സ്‌കൂളും കണ്‍വന്‍ഷന്‍ സെന്ററും ജൈവ കൃഷിയും മിനി തിയറ്ററുകളും ബിസിനസ് ക്ലബുകളും ഉണ്ടാകും. ഹെലിപാഡ്, സ്വിമ്മിങ് പൂളുകള്‍, കളിസ്ഥലങ്ങള്‍, സൈക്ലിങ് ട്രാക്ക്, ക്ലിനിക്കുകള്‍, റെസ്‌റ്റോറന്റുകള്‍, മാലിന്യ സംസ്‌കരണ പ്ലാന്റുകള്‍ തുടങ്ങിയവയെല്ലാം മൊണ്‍ടാനയില്‍ ഒരുങ്ങും.
നാളെ വൈകിട്ട് നാലിന് മൊണ്‍ടാന എസ്റ്റേറ്റില്‍ നടക്കുന്ന ചടങ്ങില്‍ കേന്ദ്ര മന്ത്രി സദാനന്ദ ഗൗഡയാണ് മലബാര്‍ ഗോള്‍ഡിന്റെ ആസ്ഥാന മന്ദിരം ഉദ്ഘാടനം ചെയ്യുക.
25 വര്‍ഷം പിന്നിടുന്ന മലബാര്‍ ഗോള്‍ഡ് ആന്‍ഡ് ഡയമണ്ട്‌സിന്റെ 10 രാജ്യങ്ങളിലായി വ്യാപിച്ചുകിടക്കുന്ന 250 ഓളം ഷോറൂമുകളുടെയും മലബാര്‍ ഗ്രൂപ്പിന്റെയും നിയന്ത്രണം ഇനി മൊണ്‍ടാന എസ്റ്റേറ്റില്‍ നിന്നായിരിക്കും.