കൊച്ചി: നവ കേരള നിര്‍മാണത്തിന് കേരളം ഒരുങ്ങുന്നത് വിദഗ്ധ പഠനം പോലും നടത്താതെയെന്ന് ആക്ഷേപം. കേരളത്തിലുണ്ടായ പ്രളയത്തെക്കുറിച്ച് സംസ്ഥാനത്തിനു പുറത്തുനിന്നുള്ള വിദഗ്ധ സംഘത്തെ വരുത്തി പഠനം നടത്തണമെന്ന തന്റെ നിര്‍ദേശം സര്‍ക്കാര്‍ തള്ളിക്കളയുകയായിരുന്നുവെന്നാണ് ഇ.ശ്രീധരന്‍ വ്യക്തമാക്കിയത്. വിശദമായ പഠനമില്ലാതെ എങ്ങനെയാണ് സംസ്ഥാന സര്‍ക്കാര്‍ നവകേരളത്തെ സൃഷ്ടിക്കുക എന്നും അദ്ദേഹം ചോദിച്ചു.

ഉന്നതതല വിദഗ്ധ സംഘം പ്രളയബാധിത പ്രദേശങ്ങള്‍ സന്ദര്‍ശിച്ച് പഠനം നടത്തണമെന്നും ദുരന്തത്തിന് കാരണമെന്തെന്ന് കണ്ടെത്തണമെന്നും താന്‍ സര്‍ക്കാറിനോട് ആവശ്യപ്പെട്ടിരുന്നു. എന്നാല്‍ സര്‍ക്കാര്‍ അത് തള്ളികളയുകയാണുണ്ടായത്. സര്‍ക്കാറിന്റെ അനാസ്ഥയെ തുടര്‍ന്ന് പൊതുതാല്‍പര്യ ഹരജിയുമായി താന്‍ ഹൈകോടതിയെ സമീപിക്കുകയാണുണ്ടായതെന്നും ഇ. ശ്രീധരന്‍ പറഞ്ഞു.