ബോവിക്കാനം: സ്വകാര്യബസുകള്‍ മുന്നറിയിപ്പില്ലാതെ സര്‍വിസ്മുടക്കുന്നത് യാത്രക്കാരെ പെരുവഴിയിലാക്കുന്നു. കാസര്‍കോട്-കുറ്റിക്കോല്‍ റൂട്ടില്‍ സ്ഥിരം പെര്‍മിറ്റ് വാങ്ങി സര്‍വിസ് നടത്തുന്ന ചില സ്വകാര്യബസുകളാണ് തുടര്‍ച്ചയായി സര്‍വിസ് മുടക്കുന്നത്. ഇതുകാരണം ആശുപത്രിയില്‍ പോകുന്ന രോഗികളും വിദ്യാര്‍ഥികള്‍ ഉള്‍പ്പെടെ ദൂരെ സ്ഥലങ്ങളില്‍ പഠിക്കാനും ജോലിക്കുമായി പോയിവരുന്നവരും ഏറെ ദുരിതം അനുഭവിക്കുകയാണ്.
കാസര്‍കോട്ടുനിന്നു എരിഞ്ഞിപുഴ, കുറ്റിക്കോല്‍, ബന്തടുക്ക ഭാഗത്തേക്കു പോകുന്ന നാലോളം ബസുകളാണ് ഇന്നലെ മാത്രം മുന്നറിയിപ്പില്ലാതെ സര്‍വിസ് മുടക്കിയത്. ഈ റൂട്ടില്‍ ഓടുന്ന ഒരു ബസ് കഴിഞ്ഞ പത്തുദിവസമായി സര്‍വിസ് നിര്‍ത്തിവച്ചിരുകയാണ്. ഇന്നലെ വൈകുന്നേരം മൂന്നുമുതല്‍ അഞ്ചര വരെ ഈ റൂട്ടില്‍ സര്‍വിസ് നടത്തേണ്ട ബസുകള്‍ ട്രിപ്പുകള്‍ മുടക്കുകയായിരുന്നു. പിന്നീട് വന്ന ബസുകളാകട്ടെ യാത്രക്കാരെ കുത്തിനിറച്ച അവസ്ഥയിലായിരുന്നതിനാല്‍ പല സ്റ്റേപ്പുകളിലും നിര്‍ത്താതെയാണ് ഓടിയത്. ഇതേ തുടര്‍ന്ന് നായന്മാര്‍മൂല, ചെര്‍ക്കള, ബോവിക്കാനം തുടങ്ങിയ സ്ഥലങ്ങളില്‍ ബസ് കാത്തുനിന്ന വിദ്യാര്‍ഥികളടക്കമുള്ള യാത്രക്കാര്‍ യഥാസമയം ബസ് കിട്ടാതായതോടെ രാത്രിയോടെയാണ് വീടുകളിലെത്തിയത്.
അതിനുപുറമെ, വിദ്യാര്‍ഥികളെ സ്റ്റോപ്പില്‍ കാണുമ്പോള്‍ സ്റ്റോപ്പില്‍ നിര്‍ത്താതെ മുന്നോട്ടും പിറകോട്ടുമായി നിര്‍ത്തുന്നതും ചില ബസുകള്‍ നിര്‍ത്താതെ പോവുന്നതും പതിവാണ്. ഡീസല്‍ വില വര്‍ധനയും താങ്ങാനാവാത്ത ദൈനംദിന ചെലവുമായതോടെയാണ് ചില ബസുകള്‍ ഓട്ടം നിര്‍ത്തിയതും മറ്റുള്ളവ ട്രിപ്പ് മുടക്കാനും തുടങ്ങിയത്. മുന്നറിയിപ്പിലാതെ സര്‍വിസ് മുടക്കുന്ന ബസുകള്‍ക്കെതിരേ നടപടി സ്വീകരിക്കണമെന്നാണ് യാത്രക്കാര്‍ ആവശ്യപ്പെടുന്നത്.