കൊയിലാണ്ടി: കൊയിലാണ്ടി ഗവ. കോളജ് വിദ്യാര്‍ഥികളെ മര്‍ദിച്ചതായി പരാതി. സ്വകാര്യ ബസ് കണ്ടക്ടറുടെ നേതൃത്വത്തിലുള്ള സംഘം ഡിഗ്രി വിദ്യാര്‍ഥികളായ അജയ്, കെ.പി അഖില്‍, സാരംഗ്, അബിന്‍ എന്നിവരെ മര്‍ദിച്ചെന്നാണ് കോളജ് അധികൃതര്‍ പൊലിസില്‍ പരാതി നല്‍കിയത്.
പരുക്കേറ്റ വിദ്യാര്‍ഥികള്‍ കൊയിലാണ്ടി താലൂക്ക് ആശുപത്രിയില്‍ ചികിത്സ തേടി. താമരശ്ശേരി-മാഹിപ്പാലം റൂട്ടിലോടുന്ന സ്വകാര്യ ബസിന്റെ കണ്ടക്ടര്‍ കഴിഞ്ഞദിവസം കോളജ് വിദ്യാര്‍ഥിനികളോട് മോശമായി പെരുമാറിയിരുന്നു.ഇതു മറ്റു കുട്ടികള്‍ ചോദ്യം ചെയ്തിരുന്നു. വ്യാഴാഴ്ച രാവിലെ ബൈക്കുകളിലെത്തിയ സംഘം പെണ്‍കുട്ടികളെ ഭീഷണിപ്പെടുത്തി. വൈകിട്ട് കോളജ് വിട്ടു വന്ന വിദ്യാര്‍ഥികളെ ആനക്കുളത്ത് വച്ച് സംഘം മര്‍ദിക്കുകയായിരുന്നു.