വടകര: നഗരസഭാ പരിധിയിലെ പ്രദേശങ്ങളില്‍ രാത്രികാല ശുചീകരണം ആരംഭിക്കാന്‍ തീരുമാനം. മുനിസിപ്പല്‍ സെക്രട്ടറിയുടെ നേതൃത്വത്തില്‍ നഗരസഭാ ഓഫിസില്‍ നടന്ന കണ്ടിജന്റ്, ആരോഗ്യവിഭാഗം ജീവനക്കാര്‍ എന്നിവരുടെ യോഗത്തിലാണ് ഇത് സംബന്ധിച്ച് തീരുമാനമെടുത്തത്.
ഇതോടെ പകല്‍ സമയങ്ങളില്‍ നടക്കുന്നതിന് സമാനമായ ശുചീകരണം രാത്രിയും നടക്കും. യോഗത്തില്‍ കണ്ടിജന്റ് തൊഴിലാളികള്‍ക്ക് സ്വഛ് സര്‍വേക്ഷന്‍ പദ്ധതിയുടെ ഭാഗമായി ശുചീകരണം സംബന്ധിച്ച പരിശീലനവും നല്‍കി. പരിശീലന പരിപാടി ചെയര്‍മാന്‍ കെ.ശ്രീധരന്‍ ഉദ്ഘാടനം ചെയ്തു. വൈസ് ചെയര്‍പേഴ്‌സണ്‍ പി.ഗീത അധ്യക്ഷയായി. ആരോഗ്യ സ്റ്റാന്‍ഡിങ് കമ്മിറ്റി ചെയര്‍മാന്‍ പി.ഗീരീഷന്‍, ടി.സി.പ്രദീപന്‍ സംസാരിച്ചു. നഗരസഭ സെക്രട്ടറി കെ.യു.ബിനി, മണലില്‍ മോഹനന്‍ എന്നിവര്‍ ക്ലാസിന് നേതൃത്വം നല്‍കി.
ഓരോ മാസവും കണ്ടിജന്റ് തൊഴിലാളികളില്‍ നിന്നു മികച്ച പ്രവര്‍ത്തനം കാഴ്ചവെക്കുന്ന തൊഴിലാളിയെ കണ്ടെത്തി ആദരിക്കുന്നതിന്റെ ഭാഗമായി ഈ വര്‍ഷം ഒക്ടോബറിലെ മികച്ച പ്രവര്‍ത്തനത്തിന് കെ.എം.മുകുന്ദനെ തെരഞ്ഞെടുത്തു.