വാടാനപ്പള്ളി: ഏങ്ങണ്ടിയൂര്‍ തിരുമംഗലത്ത് കാറിലെത്തിയ യുവാക്കള്‍ കാല്‍നടയാത്രികയായ വൃദ്ധയുടെ രണ്ടുപവന്റെ മാല കവര്‍ന്നു.തിരുമംഗലം സ്വദേശിനി വന്‍പുള്ളിപറമ്പില്‍ വിജയന്റെ ഭാര്യ ബേബിയുടെ മാലയാണ് കവര്‍ന്നത്.കഴിഞ്ഞദിവസം വൈകീട്ടോടെ തിരുമംഗലം ക്ഷേത്രത്തിന് സമീപത്ത് വെച്ചാണ് സംഭവം നടന്നത്. നടന്നുവരികയായിരുന്ന വൃദ്ധയോട് കാറില്‍ നിന്നിറങ്ങിയ യുവാവ് തിരുമംഗലം ക്ഷേത്രത്തെകുറിച്ച് തിരക്കിയിരുന്നു. ക്ഷേത്രത്തില്‍ ജീവനക്കാരനായി തിരഞ്ഞെടുക്കപ്പെട്ടെന്നും,ജോലി ഭാരം കൂടുതല്‍ വരുമോയെന്നുമായിരുന്നു യുവാവിന്റെ ചോദ്യം.
ഇതിനിടെ വൃദ്ധയുടെ മാലപൊട്ടിച്ചെടുത്ത യുവാവ് കാറില്‍കയറി രക്ഷപ്പെടുകയും ചെയ്തു.മാലപൊട്ടിക്കല്‍ നടന്നെങ്കിലും രാത്രിവരെയും ഇവര്‍ പൊലിസില്‍ പരാതി നല്‍കിയിരുന്നില്ല.
വിവരമറിഞ്ഞ് വാടാനപ്പള്ളി പൊലീസ് രാത്രി തന്നെ അന്വേഷണം നടത്തുകയും വൃദ്ധയില്‍ നിന്ന് വിവരങ്ങള്‍ ചോദിച്ചറിയുകയും സംഭവത്തില്‍ കേസെടുക്കുകയുമായിരുന്നു. വെള്ള കാറിലെത്തിയ യുവാവിനെ കൂടാതെ ഡ്രൈവറും ഉണ്ടായിരുന്നതായി വൃദ്ധ പൊലിസിന് മൊഴിനല്‍കിയിട്ടുണ്ട്.
കൂടാതെനാട്ടിക ബീച്ച് സീതിവളവില്‍ കഴിഞ്ഞദിവസം മോഷണശ്രമവും നടന്നിരുന്നു. ഹെല്‍മെറ്റും,മഴക്കോട്ടും ധരിച്ച് ബൈക്കിലെത്തിയ യുവാവ് കാല്‍നടയാത്രികയായ വീട്ടമ്മയുടെ മാലകവരാന്‍ ശ്രമിക്കുകയായിരുന്നു.നാട്ടിക സ്വദേശി കലാനിപറമ്പില്‍ സനലിന്റെ ഭാര്യ മഞ്ജുവിന്റെ ആറുപവന്റെ മാലയാണ് കവരാന്‍ ശ്രമിച്ചത്. പിടിവലിക്കിടെ മാലപൊട്ടിക്കാന്‍ കഴിയാതെ വന്നതോടെ വീട്ടമ്മയെ തള്ളിവീഴ്ത്തി യുവാവ് രക്ഷപ്പെടുകയായിരുന്നു.സംഭ വത്തില്‍ വലപ്പാട് പൊലിസ് കേസെടുത്തിട്ടുണ്ട്.