കോവളം : ഫണ്ട് അനുവദിച്ചിട്ട് മാസങ്ങളായിട്ടും റോഡുകള്‍ നവീകരിക്കാന്‍ തയാറാകാത്ത ഹാര്‍ബര്‍ എന്‍ജിനിയറിങ് ഡിപ്പാര്‍ട്ട്‌മെന്റിന്റെ നടപടിക്കെതിരേ പ്രതിഷേധമുയരുന്നു.
വിഴിഞ്ഞം മത്സ്യബന്ധ തുറമുത്തേക്കുളള പ്രധാന റോഡുകള്‍ നവീകരിക്കാനുള്ള ഫണ്ട് അനുവദിച്ചിട്ട് ആറ് മാസം കഴിഞ്ഞിട്ടും റോഡ് പണി നടത്താന്‍ തയാറാകാത്തതാണ് പ്രതിഷേധത്തിനിടയാക്കിയിരിക്കുന്നത്.
ട്രോളിങ് നിരോധനത്തോടെ ആരംഭിക്കുന്ന വിഴിഞ്ഞത്തെ മത്സ്യബന്ധന സീസണ്‍ തുടങ്ങുന്നതിന് മുമ്പായി ചെയ്യേണ്ടിയിരുന്ന ജോലിയാണ് ഹാര്‍ബര്‍ എന്‍ജിനിയറിങ് ഡിപ്പാര്‍ട്ട്‌മെന്റിന്റ് മെല്ലപ്പോക്ക് കാരണം ഇഴയുന്നത്.
മത്സ്യബന്ധ സീസണിനോടുബന്ധിച്ചുളള ഒരുക്കങ്ങളെ സംബന്ധിച്ച് കലക്ടര്‍ വിളിച്ചുചേര്‍ത്ത വിവിധ വകുപ്പുകളുടെ യോഗത്തിലാണ് റോഡ് നവീകരണം വൈകിയത് .
സംബന്ധിച്ച വിഷയം ചര്‍ച്ചയായത്.ആഴാകുളം ജങ്ഷന്‍ മുതല്‍ സീവേഡ് വാര്‍ഫ് വരെയും വിഴിഞ്ഞം കെ.എസ്.ആര്‍.ടി.സി ഡിപ്പോ മുതല്‍ ലീവേഡ് വാര്‍ഫ് വരെയുമുളള റോഡുകളാണ് മത്സ്യബന്ധന സീസണ്‍ ആരംഭിക്കുന്നതിന് മുമ്പായി നവീകരിക്കേണ്ടിയിരുന്നത്.
ഹാര്‍ബര്‍ എന്‍ജിനിയറിങ് വകുപ്പിനാണ് നിര്‍മാണ ചുമതല.നവീകരണത്തിനായി ഏട്ട് കോടി രൂപ കഴിഞ്ഞ ഡിസംബറോടെ തുറമുഖ വകുപ്പ് ഹാര്‍ബര്‍ എന്‍ജിനിയറിങ് വകുപ്പിന് കൈമാറിയിരുന്നു.
നവീകരണം വൈകിയത് സംബന്ധിച്ച് ചോദ്യം ഉയര്‍ന്നപ്പോള്‍ സാങ്കേതികാനുമതി(ടി.എസ്.) കിട്ടാനുണ്ടെന്നായിരുന്നു മറുപടി. എന്നാല്‍ ടി.എസ് ലഭിക്കുന്നതിന് ഇത്രയുംകാലതാമസം വേണ്ടിവരുന്നത് സംബന്ധിച്ച് യോഗത്തില്‍ വിമര്‍ശനം ഉയര്‍ന്നു.
ഇതോടെ മത്സബന്ധന സീസണ്‍ കഴിയുംമുമ്പ് അത്യാവശ്യ അറ്റകുറ്റപ്പണികള്‍ നടത്താനും മഴക്കാലം കഴിഞ്ഞ് നവീകരണ ജോലികള്‍ ആരംഭിക്കാനും യോഗത്തില്‍ ഹാര്‍ബര്‍ എന്‍ജിനിയറിങ് വിഭാഗത്തിന് കലക്ടര്‍ നിര്‍ദേശം നല്‍കി.
മത്സ്യബന്ധന സീസണില്‍ ഏറെതിരക്കനുഭവപ്പെടുന്ന ഇവിടെ എണ്ണമറ്റം വാഹനങ്ങളാണ് വന്നുപോകുന്നത്.