ഹൈദരാബാദ്: ഡിസംബര്‍ ഏഴിനു തെരഞ്ഞെടുപ്പ് നടക്കുന്ന തെലങ്കാനയില്‍ ഘടകകക്ഷികളുമായുള്ള സീറ്റ് വിഭജന ചര്‍ച്ച പൂര്‍ത്തിയായതായി കോണ്‍ഗ്രസ്. പാര്‍ട്ടി അധ്യക്ഷന്‍ രാഹുല്‍ ഗാന്ധിയുമായി ചര്‍ച്ച ചെയ്ത ശേഷം അദ്ദേഹമായിരിക്കും ഇതുസംബന്ധിച്ച ഔദ്യോഗിക പ്രഖ്യാപനം നടത്തുകയെന്നും തെലങ്കാന കോണ്‍ഗ്രസ് നേതൃത്വം അറിയിച്ചു.
ടി.ഡി.പി, തെലങ്കാന ജനസമിതി, സി.പി.ഐ എന്നീ പാര്‍ട്ടികളാണ് കോണ്‍ഗ്രസുമായി സഖ്യത്തില്‍ മത്സരിക്കുന്നത്. എന്നാല്‍, 119 അംഗ സഭയില്‍ കോണ്‍ഗ്രസ് എത്ര സീറ്റുകളില്‍ മത്സരിക്കുമെന്ന കാര്യത്തില്‍ ഇതുവരെ വെളിപ്പെടുത്തലുണ്ടായിട്ടില്ല. 90ല്‍ കുറയാത്ത സീറ്റുകളില്‍ കോണ്‍ഗ്രസ് മത്സരിക്കുമെന്നാണ് അനൗദ്യോഗിക വിവരം.
തെലുഗുദേശം പാര്‍ട്ടി 14 മുതല്‍ 18 സീറ്റുകളില്‍വരെ മത്സരിക്കുമെന്നാണ് അവകാശപ്പെടുന്നത്. എട്ടു മുതല്‍ 10 സീറ്റുകള്‍വരെ തങ്ങള്‍ക്കു കോണ്‍ഗ്രസ് വാഗ്ദാനം ചെയ്തിട്ടുണ്ടെന്ന് തെലങ്കാന ജനസമിതി അധ്യക്ഷന്‍ പ്രൊഫ. എം. കോദണ്ഡ റാം പറഞ്ഞു. സി.പി.ഐക്കു മൂന്നു സീറ്റുകളാണ് വാഗ്ദാനം ചെയ്തതെന്നും പറയപ്പെടുന്നു.
ഇക്കാര്യത്തില്‍ ഇന്ന് നടക്കുന്ന പാര്‍ട്ടി എക്‌സിക്യൂട്ടീവ് യോഗം ചര്‍ച്ച നടത്തുമെന്ന് സി.പി.ഐ ജനറല്‍ സെക്രട്ടറി എസ്. സുധാകര്‍ റെഡ്ഡി പറഞ്ഞു.