മലപ്പുറം: മൂന്നാം സപ്ലിമെന്ററി അലോട്ട്‌മെന്റില്‍ ജില്ലയില്‍ പ്ലസ്‌വണ്‍ പ്രവേശനത്തിനു ഒഴിവുള്ള സീറ്റുകളിലേക്ക് അലോട്ട്‌മെന്റ് ലഭിച്ച വിദ്യാര്‍ഥികളുടെ പ്രവേശനം ഇന്ന് അവസാനിക്കും.
പ്ലസ്‌വണ്‍ പ്രവേശനത്തിന്റെ മുഖ്യഘട്ട അലോട്ട്‌മെന്റിനും സപ്ലിമെന്ററി അലോട്ട്‌മെന്റിനും ശേഷം ഒഴിവുള്ള സീറ്റുകളിലേക്കുള്ള കോമ്പിനേഷന്‍ മാറ്റ ഫലവും കഴിഞ്ഞ ദിവസം പ്രസിദ്ധീകരിച്ചിരുന്നു. ഇതിലേക്കുള്ള പ്രവേശനവും ഇന്ന് വൈകീട്ട് നാലിനകം പൂര്‍ത്തിയാക്കണം. രണ്ടാം സപ്ലിമെന്ററി അലോട്ട്‌മെന്റിനു ശേഷം ജില്ലയിലെ വിവിധ സ്‌കൂളുകളിലായി 640 മെറിറ്റു സീറ്റുകളാണ് ഒഴിവുള്ളത്. ഈ ഒഴിവുകളാണ് മൂന്നാം സപ്ലിമെന്ററി അലോട്ട്‌മെന്റിലൂടെ നികത്തിയത്.
അതേ സമയം മൂന്നാം സപ്ലിമെന്ററി അലോട്ട്‌മെന്റിനു ശേഷവും മെറിറ്റു സീറ്റുകളില്‍ ഒഴിവുണ്ടെങ്കില്‍ നികത്താന്‍ വീണ്ടും അലോട്ട്‌മെന്റ് നടത്തുമെന്ന് ഹയര്‍ സെക്കന്‍ഡറി ഡയറക്ടര്‍ അറിയിച്ചിട്ടുണ്ട്.
അലോട്ട്‌മെന്റ് ലഭിക്കാത്തവര്‍ക്ക് മെറിറ്റു ക്വാട്ടയില്‍ ലഭ്യമാകുന്ന ഒഴിവുകളില്‍ പ്രവേശനം നേടുന്നതിനുള്ള തുടര്‍ നിര്‍ദ്ദേശങ്ങളും ലഭ്യമായ ഒഴിവു സംബന്ധിച്ച വിവരങ്ങളും എട്ടിന് പ്രസിദ്ധീകരിക്കുമെന്നും അറിയിച്ചിട്ടുണ്ട്.