മഞ്ചേശ്വരം: ജോസ് കെ മാണിക്കെതിരേ നിലപാട് കടുപ്പിച്ച് പി.ജെ ജോസഫ്. ജോസ് കെ മാണി കേരള കോണ്‍ഗ്രസ് പാര്‍ട്ടിയില്‍ ഇല്ലെന്നും ഇനി സ്വന്തം വഴി നോക്കാമെന്നും വര്‍ക്കിംഗ് ചെയര്‍മാന്‍ പി.ജെ ജോസഫ് മാധ്യമപ്രവര്‍ത്തകരോട് പറഞ്ഞു. ആദ്ദേഹത്തിന്റെ കൂടെയുള്ളവരും തന്നോടൊപ്പം കൂടുന്ന കാഴ്ച്ചയാണ് കണ്ടു വരുന്നതെന്നും അദ്ദേഹം അവകാശപ്പെട്ടു. ഓരോ ദിവസവും അണികള്‍ ജോസ് കെ മാണി വിഭാഗത്തെ തള്ളി വന്നുകൊണ്ടിരിക്കുകയാണ്. പാലായില്‍ തന്നോടൊപ്പം ആളുണ്ടോ എന്ന് കാട്ടിക്കൊടുക്കും. ഇത് വ്യക്തമാക്കാന്‍ പാലായില്‍ മണ്ഡലം റാലി സംഘടിപ്പിക്കും.

26ന് ചേരുന്ന യോഗം ഇത് സംബന്ധിച്ച തീരുമാനമെടുക്കും. പാലായില്‍ ജോസ് കെ മാണി മത്സരിപ്പിച്ചത് ജനസമ്മതി ഇല്ലാത്ത സ്ഥാനാര്‍ഥിയാണ്. തെറ്റുതിരുത്താന്‍ ജോസ് കെ മാണി തയ്യാറായാല്‍ നല്ലതാണന്നും ജോസഫ് പറഞ്ഞു.

മുന്നണിയില്‍ രണ്ടു വിഭാഗം കേരള കോണ്‍ഗ്രസ് എം ഇല്ല. യഥാര്‍ഥ പാര്‍ട്ടി തനിക്കൊപ്പമാണ്. ജോസ് കെ മാണി വിഭാഗം പിരിഞ്ഞു പോയവരാണ്. മഞ്ചേശ്വരത്ത് യു.ഡി.എഫ് ജയിക്കുമെന്നും വട്ടിയൂര്‍ക്കാവില്‍ ബി.ജെ.പി മൂന്നാം സ്ഥാനത്തെന്നും അദ്ദേഹം കൂട്ടിച്ചേര്‍ത്തു.

ജോസ് കെ മാണിക്കൊപ്പമാണോ പി.ജെ. ജോസഫിനൊപ്പമാണോ കേരളാ കോണ്‍ഗ്രസ് എന്ന തര്‍ക്കം പാര്‍ട്ടിയില്‍ മുറുകുമ്പോള്‍ മഞ്ചേശ്വരത്ത് യു.ഡി.എഫ് പ്രചാരണത്തില്‍ നിന്നും ജോസ് കെ മാണി എം.പി ഇല്ല. അതേസമയം പാര്‍ട്ടിയില്‍ കലാപകൊടി ഉയര്‍ത്തിയ വര്‍ക്കിംഗ് ചെയര്‍മാന്‍ പി.ജെ. ജോസഫ് ഇന്നലെ പ്രചാരണത്തിനെത്തി. കിട്ടിയ അവസരത്തിന് ജോസ് കെ മാണിയെ വെല്ലുവിളിച്ച് മടങ്ങുകയും ചെയ്തു. യു.ഡി.എഫിന്റെ എല്ലാ ഘടകകക്ഷി നേതാക്കളും മഞ്ചേശ്വരത്ത് പ്രചാരണത്തിനെത്തുന്നുണ്ടെങ്കിലും 18ന് വരെ മണ്ഡലത്തില്‍ എത്തുന്ന നേതാക്കളുടെ പട്ടികയിലും ജോസ് കെ മാണി ഇടം പിടിച്ചിട്ടില്ല. അടുത്തിടെ നടന്ന പാലാ ഉപതെരഞ്ഞെടുപ്പില്‍ യു.ഡി.എഫിന് അപ്രതീക്ഷിതമായ പരാജയത്തിനിടയാക്കിയത് ജോസ് കെ മാണിയുടെ നിലപാടായിരുന്നുവെന്നതാണ് യു.ഡി.എഫിന്റെ വിലയിരുത്തല്‍. എല്‍.ഡി.എഫ് പാലാ ഉപതെരഞ്ഞെടുപ്പ് വിജയം പ്രചാരണവിഷയമാക്കുമ്പോള്‍ ജോസ് കെ മാണി പ്രചാരണത്തിനെത്തിയാല്‍ അത് ഗുണം ചെയ്യില്ലെന്ന നിലപാടാണ് യു.ഡി.എഫിനുള്ളത്.

അതേസമയം മണ്ഡലത്തിലെ വൊര്‍ക്കാടി പഞ്ചായത്തിലെ ഒരു വാര്‍ഡില്‍ കേരള കോണ്‍ഗ്രസിന് ഒരു അംഗവുമുണ്ട്. ജസിന്താ ഡിസൂസാ എന്ന വനിതാ അംഗമാണ് ഇവിടെ കേരള കോണ്‍ഗ്രസ് എമ്മിന് ഉള്ളത്. ഇവര്‍ കടുത്ത ജോസ്.കെ മാണി പക്ഷകാരിയുമായിട്ടാണ് അറിയപ്പെടുന്നത്. 4000 ഓളം വോട്ട് മണ്ഡലത്തില്‍ കേരള കോണ്‍ഗ്രസിന് ഉണ്ടെന്നാണ് അവകാശവാദം.