കണ്ണൂര്‍: ജില്ലാ പൊലിസ് കായികമേളയ്ക്കു കണ്ണൂര്‍ പൊലിസ് പരേഡ് ഗ്രൗണ്ടില്‍ തുടക്കമായി. ഇരിട്ടി, തലശ്ശേരി, തളിപ്പറമ്പ്, കണ്ണൂര്‍ എന്നീ നാലു സബ് ഡിവിഷനുകളും ഒരു സ്‌പെഷല്‍ യൂനിറ്റും ഡിസ്ട്രിക്റ്റ് ഹെഡ് ക്വാര്‍ട്ടേഴ്‌സും ഉള്‍പ്പെട്ട ആറു ഡിവിഷനുകളിലായാണു മത്സരം നടക്കുന്നത്. 200, 400 മീറ്റര്‍ റിലേ, ലോങ്ങ് ജംപ്, കമ്പവലി, ഷട്ടില്‍, ഫുട്‌ബോള്‍, ഓട്ട മത്സരം, ഹഡില്‍സ്, ഹാമര്‍ ത്രോ, പോള്‍വാള്‍ട്ട് എന്നീ ഇനങ്ങള്‍ ഇന്നലെ പൂര്‍ത്തിയായപ്പോള്‍ 49 പോയിന്റുമായി തലശേരി സബ്ഡിവിഷനാണു മുന്നില്‍. 32 പോയിന്റുമായി ജില്ലാ ആസ്ഥാനം രണ്ടാം സ്ഥാനത്തും തൊട്ടുപിറകെ 23 പോയിന്റുമായി കണ്ണൂര്‍ സബ് ഡിവിഷന്‍ മൂന്നാം സ്ഥാനത്തും നിലയുറപ്പിച്ചു.
10,000 മീറ്റര്‍ കണ്ണൂര്‍ ഡിസ്ട്രിക്റ്റ് ഹെഡ് ക്വാര്‍ട്ടേഴ്‌സിന്റെ മരിയ ജോസും 1500 മീറ്റര്‍ ഓട്ട മത്സരത്തില്‍ കണ്ണൂര്‍ ഡിസ്ട്രിക്റ്റ് ഹെഡ് ക്വാര്‍ട്ടേഴ്‌സിന്റെ തന്നെ അനൂപും ഒന്നാമതെത്തി. ഷോട്ട് പുട്ടില്‍ തലശ്ശേരി സബ് ഡിവിഷനിലെ അബ്ദുല്‍നിഷാദ് ഒന്നാമതെത്തി.
ഫുട്‌ബോളില്‍ കണ്ണൂര്‍ ഡിസ്ട്രിക്റ്റ് ഹെഡ് ക്വാര്‍ട്ടേഴ്‌സും ക്രിക്കറ്റില്‍ തലശ്ശേരി സബ് ഡിവിഷനും വിജയികളായി. മാര്‍ച്ച് പാസ്റ്റില്‍ കണ്ണൂര്‍ ഡിസ്ട്രിക്റ്റ് ഹെഡ് ക്വാര്‍ട്ടേഴ്‌സ് ഒന്നാമതെത്തി. മത്സരങ്ങള്‍ ഇന്നു സമാപിക്കും. കായികമേള ഐ.ജി ബല്‍റാംകുമാര്‍ ഉപാധ്യായ ഉദ്ഘാടനം ചെയ്തു. എസ്.പി ജി. ശിവവിക്രം അധ്യക്ഷനായി.