തിരുവനന്തപുരം: കൊച്ചി പുതുവൈപ്പ് ഐ.ഒ.സി പാചകവാതക പ്ലാന്റിനെതിരെ നടന്ന സമരത്തെ നേരിട്ട പൊലിസ് നടപടിയെ ന്യയീകരിച്ച് ഡി.ജി.പി ടി.പി സെന്‍കുമാര്‍ രംഗത്തെത്തിയതിനു പിന്നാലെ ഇതേ വാദം ഏറ്റുപിടിച്ച് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. പ്രധാനമന്ത്രി നരേന്ദ്ര മോദിയുടെ സുരക്ഷ മുന്‍നിര്‍ത്തിയായിരുന്നു നടപടിയെന്നാണ് ഇരുവരുടെയും ന്യായീകരണം.

പ്രധാനമന്ത്രി വരുന്ന ദിവസം സമരക്കാര്‍ പ്രതിഷേധം ഒഴിവാക്കണമായിരുന്നുവെന്നും കോടിയേരി പറഞ്ഞു. പുതുവൈപ്പിലെ പദ്ധതി നടപ്പിലാക്കാന്‍ സര്‍ക്കാര്‍ ബാധ്യസ്ഥമാണ്. പൊലിസ് നടപടിയെ എതിര്‍ത്ത സി.പി.ഐ നിലപാടിനെപ്പറ്റി ചോദിച്ചപ്പോള്‍, അതു സി.പി.ഐയുടെ അഭിപ്രായമാണെന്നും അദ്ദേഹം പ്രതികരിച്ചു.

പ്രധാനമന്ത്രിക്ക് പോകേണ്ട വഴിയിലാണ് സമരക്കാര്‍ തടസ്സമുണ്ടാക്കിയതെന്നും അദ്ദേഹത്തിന്റെ സന്ദര്‍ശനവുമായി ബന്ധപ്പെട്ടാണ് സമരക്കാരെ നീക്കിയതെന്നും നേരത്തെ ഡി.ജി.പി പറഞ്ഞിരുന്നു.