മാനന്തവാടി: ജില്ലക്ക് അഭിമാനമായി തോല്‍പ്പെട്ടി സ്വദേശി ആശ്വിന്‍ വിശ്വനാഥ്. കേരള എഞ്ചിനീയറിങ് എന്‍ട്രന്‍സ് പരീക്ഷയില്‍ എസ്.സി വിഭാഗത്തില്‍ സംസ്ഥാനതലത്തില്‍ രണ്ടാം റാങ്ക് നേടിയാണ് അശ്വിന്‍ അഭിമാനമായത്. സാമ്പത്തിക പ്രതിസന്ധികളെ തരണം ചെയ്താണ് അശ്വിന്റെ തിളക്കമാര്‍ന്ന വിജയം. കേരള എന്‍ട്രന്‍സ് പരീക്ഷയില്‍ 694 മാര്‍ക്കാണ് അശ്വിന്‍ കരസ്ഥമാക്കിയത്. തോല്‍പ്പെട്ടി ഗവ. യു.പി സ്‌കൂളിലും കല്‍പ്പറ്റ നവോദയ സ്‌കൂളിലും പൂര്‍വവിദ്യാര്‍ഥിയായ അശ്വിന്‍ പാല ബ്രില്ല്യന്‍സ് കോച്ചിങ് കേന്ദ്രത്തിലായിരുന്നു എന്‍ട്രന്‍സ് പരിശീലനം. കേരള എന്‍ട്രന്‍സില്‍ രണ്ടാം റാങ്ക് നേടിയെങ്കിലും തനിക്ക് ഐ.ഐ.ടി മദ്രാസില്‍ ചേര്‍ന്ന് പഠിക്കാനാണ് താല്‍പര്യമെന്നും അതിനായി അലോട്ട്‌മെന്റിനായി കാത്തിരിക്കുകയാണെന്നും വീട്ടുകാരുടേയും പരിശീലന കേന്ദ്രത്തിലെ അധ്യാപകരുടേയും പിന്തുണയാണ് തന്റെ നേട്ടത്തിന് കാരണമെന്നും അശ്വിന്‍ പറഞ്ഞു. തോല്‍പ്പെട്ടി ചെക്ക്‌പോസ്റ്റിനു സമീപം കൊല്ലിക്കല്‍ വീട്ടില്‍ വിശ്വനാഥന്റെയും സുമതിയുടെയും മൂത്തമകനാണ് അശ്വിന്‍.