മേപ്പാടി: ആവശ്യത്തിന് ഡോക്ടര്‍മാരും ജീവനക്കാരുമില്ലാത്തതിനാല്‍ മേപ്പാടി സാമൂഹികാരോഗ്യകേന്ദ്രത്തില്‍ ചികിത്സ തേടിയെത്തുന്നവര്‍ ദുരിതത്തില്‍. ദിനംപ്രതി ശരാശരി 300 രോഗികളെത്തുന്ന സാമൂഹികാരോഗ്യ കേന്ദ്രത്തില്‍ ഒന്നോ രണ്ടോ ഡോക്ടര്‍മാരാണ് പരിശോധനയ്ക്കുള്ളത്. 

ആശുപത്രിയിലെ മറ്റുപ്രവര്‍ത്തനങ്ങള്‍ക്ക് ആവശ്യത്തിന് ജീവനക്കാരില്ലാത്തതും രോഗികള്‍ക്ക് ദുരിതമായിരിക്കുകയാണ്. ചീട്ടെഴുതാനും മരുന്നുകള്‍ എടുത്തുകൊടുക്കാനും ഒരു ജീവനക്കാരന്‍ മാത്രമാണുള്ളത്. തിരക്കിനിടയില്‍ കൊടുത്ത മരുന്ന് മാറിപ്പോയ സംഭവവും ഇവിടെയുണ്ടായിട്ടുണ്ട്.
പകര്‍ച്ചപ്പനിയടക്കമുള്ള രോഗങ്ങളുമായി നൂറുകണക്കിനാളുകളാണ് നിത്യവും ഇവിടെ ചികിത്സ തേടിയെത്തുന്നത്.
ആവശ്യത്തിന് ജീവനക്കാരില്ലാത്തതിനാല്‍ വയോജനങ്ങളും സ്ത്രീകളും കുട്ടികളുമെല്ലാമായി നൂറുകണക്കിനാളുകള്‍ മണിക്കൂറുകളോളം കാത്തുനിന്ന് ദുരിതമനുഭവിക്കേണ്ട ഗതികേടാണുള്ളത്.
പഞ്ചായത്തിന് കീഴിലായിരുന്ന പ്രാഥമികാരോഗ്യകേന്ദ്രം സാമൂഹികാരോഗ്യകേന്ദ്രമാക്കി ഉയര്‍ത്തിയിട്ട് എട്ട് വര്‍ഷം കഴിഞ്ഞിട്ടും കടുത്ത അവഗണനയാണ് ആശുപത്രിയോട് അധികൃതര്‍ കാണിക്കുന്നതെന്ന ആക്ഷേപം ശക്തമാണ്.