തിരുവനന്തപുരം: ജില്ലാ സഹകരണ ബാങ്കുകളിലെ അഡ്മിനിസ്‌ട്രേറ്റിവ് ഭരണം നീട്ടിക്കൊണ്ട് സര്‍ക്കാര്‍ വീണ്ടും ഉത്തരവിറക്കി.
ജില്ലാ സഹകരണ ബാങ്കുകളെ യോജിപ്പിച്ച് സംസ്ഥാനത്തിന്റെ സ്വന്തം ബാങ്കായി കേരള ബാങ്ക് രൂപീകരിക്കാന്‍ റിസര്‍വ് ബാങ്കിന്റെ അനുമതി ലഭിച്ചെങ്കിലും എന്ന് നടപ്പാകുമെന്ന് ധാരണയില്ലാത്തതിനാലാണ് അഡ്മിനിസ്‌ട്രേറ്റിവ് ഭരണം നീട്ടാന്‍ സര്‍ക്കാരിന് ഉത്തരവിറക്കേണ്ടി വന്നത്. 2020 ഏപ്രില്‍ 10 വരെയോ, കേരള ബാങ്ക് നിലവില്‍ വരുന്നതുവരെയോ അഡ്മിനിസ്‌ട്രേറ്റിവ് ഭരണം തുടരുമെന്നാണ് ഉത്തരവില്‍ പറയുന്നത്.
അഡ്മിനിസ്‌ട്രേറ്റര്‍ ഭരണം ഏര്‍പ്പെടുത്തി ആറുമാസത്തിനുള്ളില്‍ തെരഞ്ഞെടുപ്പ് നടത്തണം എന്നാണ് നിയമം. ഇല്ലെങ്കില്‍ ആറുമാസംകൂടി തല്‍സ്ഥിതി തുടരാം.
എന്നാല്‍ രണ്ടു വര്‍ഷത്തിലേറെയായി സംസ്ഥാനത്തെ ജില്ലാ സഹകരണ ബാങ്കുകളില്‍ അഡ്മിനിസ്‌ട്രേറ്റിവ് ഭരണമാണ് നടക്കുന്നത്.
കേരള ബാങ്ക് രൂപീകരിക്കുന്നതിന്റെ ഭാഗമായി 2017ലാണ് തെരഞ്ഞെടുക്കപ്പെട്ട ഭരണസമിതികളെ പിരിച്ചുവിട്ട് ജില്ലാ ബാങ്കുകളില്‍ സര്‍ക്കാര്‍ അഡ്മിനിസ്‌ട്രേറ്റിവ് ഭരണം ഏര്‍പ്പെടുത്തിയത്. കേരള ബാങ്ക് രൂപീകരണം പല കാരണങ്ങള്‍കൊണ്ട് നീണ്ടപ്പോള്‍ അതിനൊപ്പം നിയമം അട്ടിമറിച്ച് അഡ്മിനിസ്‌ട്രേറ്റിവ് ഭരണവും സര്‍ക്കാര്‍ നീട്ടുകയായിരുന്നു.