തിരുവനന്തപുരം: പകര്‍ച്ചപ്പനി വര്‍ധിച്ച സാഹചര്യത്തില്‍ സര്‍ക്കാരിനെ സഹായിച്ച് കൊണ്ട് ഇന്ത്യന്‍ മെഡിക്കല്‍ അസോസിയേഷന്‍ ചെയ്യുന്ന സേവനം മഹത്തരമാണെന്ന് ആരോഗ്യ വകുപ്പ് മന്ത്രി കെ.കെ. ശൈലജ.
ആരോഗ്യ വകുപ്പിന്റെ സഹകരണത്തോടെ ഐ.എം.എ. ജനറല്‍ ആശുപത്രി ക്യാംപസില്‍ തുടങ്ങിയ പനി ക്ലിനിക്കിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി. കേരളത്തിലെ ജനത്തിരക്കുള്ള മറ്റ് സ്ഥലങ്ങിലും ഐ.എം.എ. ഇതുപോലെയുള്ള സേവനങ്ങള്‍ നല്‍കി വരുന്നുണ്ട്. പകര്‍ച്ചപ്പനികള്‍ തുടങ്ങിയ സമയത്തുതന്നെ സര്‍ക്കാരുമായി സഹകരിച്ച് ഐ.എം.എ. നിരവധി ബോധവല്‍കരണ പരിപാടികളും സംഘടിപ്പിച്ചിരുന്നു.
കാലാവസ്ഥാ വ്യതിയാനം കാരണം പകര്‍ച്ച വ്യാധികള്‍ വര്‍ധിക്കുമെന്ന് കണക്കുകൂട്ടി നേരത്തെ തന്നെ പ്രതിരോധ പ്രവര്‍ത്തനങ്ങള്‍ നടത്തിയിരുന്നുവെങ്കിലും ഡെങ്കിപ്പനി നിയന്ത്രിക്കാനായില്ല.
ആരോഗ്യ മേഖലയിലെ വിദഗ്ധര്‍ രണ്ടാഴ്ചയിലൊരിക്കല്‍ യോഗം കൂടി പകര്‍ച്ചപ്പനി നിയന്ത്രണത്തിനായുള്ള നടപടികളെടുത്തു വരുന്നു. ആരോഗ്യ വകുപ്പ് ഡയറക്ടറേറ്റ്, എന്‍.എച്ച്.എം., ആരോഗ്യ വകുപ്പ് മന്ത്രിയുടെ ഓഫിസ് എന്നിവിടങ്ങളിലുള്ള കണ്‍ട്രോള്‍ റൂമും ജനങ്ങളുടെ സഹായത്തിനുണ്ടെന്നും മന്ത്രി പറഞ്ഞു.
ഇത് കാലാനുസൃതമായി പരിഹരിക്കേണ്ടത് അത്യാവശ്യമാണെന്നും മന്ത്രി വ്യക്തമാക്കി.
ഡി.എം.ഒ. ഡോ. ജോസ് ഡിക്രൂസ്, ജനറല്‍ ആശുപത്രി സൂപ്രണ്ട് ഡോ. വനജ, ഐ.എം.എ. തിരുവനന്തപുരം പ്രസിഡന്റ് ഡോ. ജോണ്‍ പണിക്കര്‍, സെക്രട്ടറി ഡോ. ഡോ. ജി.എസ്. വിജയകൃഷ്ണന്‍ പങ്കെടുത്തു.പകര്‍ച്ചപ്പനി നേരിടാനാന്‍ അടിയന്തിരമായി ചെയ്യേണ്ട കാര്യങ്ങള്‍ ഉള്‍ക്കൊള്ളിച്ച് ഐ.എം.എ. തയ്യാറാക്കിയ നയരേഖ ഐ.എം.എ. മുന്‍ സംസ്ഥാന പ്രസിഡന്റ് ഡോ. ശ്രീജിത്ത് എന്‍. കുമാര്‍ മന്ത്രിക്ക് കൈമാറി.
 തുടര്‍ന്ന് ജില്ലയിലെ സ്വകാര്യ ആശുപത്രി മേധാവികളുടെ പനി ചികിത്സയുമായി ബന്ധപ്പെട്ട അവലോകന യോഗം ഐ.എം.എ. ഹാളില്‍ നടന്നു.
 പനി ചികിത്സയുമായി ബന്ധപ്പെട്ട മാര്‍ഗരേഖ സ്വകാര്യാശുപത്രികളിലെ ഡോക്ടര്‍മാരിലെത്തിക്കാന്‍ ശ്രമിക്കുന്നതാണ് ഐ.എം.എ. മന്ത്രിയെ അറിയിച്ചു.
എച്ച്1 എന്‍1 ചികിത്സയ്ക്കാവശ്യമായ ഒസല്‍ട്ടാമാവിര്‍ ഗുളികകള്‍ സ്വകാര്യ ആശുപത്രികളില്‍ കൂടി എത്തിക്കാന്‍ ശ്രമിക്കുമെന്ന് മന്ത്രി യോഗത്തില്‍ അറിയിച്ചു. ജനറല്‍ ആശുപത്രി അത്യാഹിത വിഭാഗത്തിന് സമീപം ഉച്ചയ്ക്ക് 2 മണി മുതല്‍ വൈകുന്നേരം 6 മണിവരെയാണ് ഐ.എം.എ.യുടെ പനി ക്ലിനിക്ക് പ്രവര്‍ത്തിക്കുക. ഐ.എം.എ.യുടെ വിദഗ്ധ ഡോക്ടര്‍മാര്‍ സൗജന്യമായാണ് ഈ ക്ലിനിക്കില്‍ രോഗികളെ പരിശോധിക്കുക.