കണ്ണൂര്‍: നഗരത്തില്‍ പട്ടാപ്പകല്‍ സാമൂഹ്യ വിരുദ്ധര്‍ വായനശാല കത്തിച്ചു. ധനലക്ഷ്മി ആശുപത്രിക്ക് സമീപം കണ്ണോത്തുംചാല്‍ റോഡില്‍ ശ്രീനാരായണ ലൈബ്രറിക്കാണ് തീയിട്ടത്.
ലൈബ്രറിക്കുള്ളില്‍ പഴയ പത്രമാസികകളും ഫര്‍ണിച്ചറുകളും കത്തിനശിച്ചു. തീ കത്തുന്നത് കണ്ട് നാട്ടുകാര്‍ ഓടി കൂടിയാണ് തീ അണച്ചത്. ശ്രീനാരായണ യു.പി സ്‌കൂള്‍ കെട്ടിടത്തോടനുബന്ധിച്ച് തന്നെയാണ് വായനശാലയും പ്രവര്‍ത്തിക്കുന്നത്.
തീ പടര്‍ന്നിരുന്നെങ്കില്‍ സ്‌കൂള്‍ കെട്ടിടം ഉള്‍പ്പെടെ കത്തിനശിക്കുമായിരുന്നു. തീയിട്ടതാണെന്നാണു സംശയം. അയ്യായിരത്തോളം പുസ്തകങ്ങളുള്ള പ്രദേശത്തെ പ്രധാന ലൈബ്രറിയാണിത്. പൊലിസ് സ്ഥലത്തെത്തി അന്വേഷണം തുടങ്ങി. സംഭവത്തില്‍ വായനശാലാ ഭാരവാഹികള്‍ പൊലിസില്‍ പരാതിനല്‍കി.