ജെയ്പൂര്‍: ജമ്മു കശ്മിരില്‍ ഭീകരര്‍ കൊലപ്പെടുത്തിയ ട്രക്ക് ഡ്രൈവര്‍ മുഹമ്മദ് ഇല്യാസിന്റെ മൃതദേഹം ബന്ധുക്കള്‍ ഏറ്റുവാങ്ങി.
ഇല്യാസിന്റെ മരണത്തോടെ പ്രതിസന്ധിയിലായ കുടുംബത്തിലൊരാള്‍ക്ക് സര്‍ക്കാര്‍ ജോലി നല്‍കണമെന്നും അടിയന്തര ധനസഹായമായി 21 ലക്ഷം രൂപയും നല്‍കിയെങ്കില്‍ മാത്രമേ മൃതദേഹം ഏറ്റുവാങ്ങൂ എന്ന് ബന്ധുക്കള്‍ വ്യക്തമാക്കിയിരുന്നു.
ഈ ആവശ്യമുന്നയിച്ച് ഇല്യാസിന്റെ ഭാര്യയും നാല് കുട്ടികളും ആള്‍വാര്‍ ജില്ലാ കലക്ടറുടെ ഓഫിസിന് മുന്‍പില്‍ ധര്‍ണ നടത്തിയിരുന്നു. മൂന്നുവട്ടം ചര്‍ച്ച നടത്തിയെങ്കിലും പ്രശ്‌നത്തിന് പരിഹാരമാകാത്ത സാഹചര്യത്തില്‍ ധര്‍ണയില്‍ നിന്ന് വിട്ടുനില്‍ക്കില്ലെന്നും മൃതദേഹം ഏറ്റുവാങ്ങില്ലെന്നും ബന്ധുക്കള്‍ വ്യക്തമാക്കി.
അവസാനം നടന്ന ചര്‍ച്ചയില്‍ 6.5 ലക്ഷം രൂപ നഷ്ടപരിഹാരം സ്വീകരിക്കാന്‍ ഇല്യാസിന്റെ ഭാര്യയും മറ്റ് ബന്ധുക്കളും സമ്മതിച്ചു. ഭാര്യക്ക് സര്‍ക്കാര്‍ ജോലി നല്‍കാമെന്ന ഉറപ്പും നല്‍കിയതായി ജില്ലാ കലക്ടര്‍ രാമചന്ദ്ര ശര്‍മ അറിയിച്ചു. കൂടാതെ സര്‍ക്കാരിന്റെ വിവിധ ക്ഷേമ പദ്ധതികളുടെ ആനുകൂല്യം നല്‍കുമെന്നും അദ്ദേഹം വ്യക്തമാക്കി. രാജസ്ഥാന്‍ സര്‍ക്കാര്‍ രണ്ട് ലക്ഷവും ജമ്മു കശ്മിര്‍ സര്‍ക്കാര്‍ 4.5 ലക്ഷം രൂപയും നല്‍കും.